“XOCALI - QAN YADDAŞIMIZ” ADLI TƏDBİR KEÇİRİLMİŞDİR
Bakı, 25 fevral (AZƏRTAC). Fevralın 25-də Üzeyir Hacıbəylinin ev-muzeyində Xocalı faciəsinin 17-ci ildönümünə həsr olunmuş mərasim keçirilmişdir.
Tədbirdə şairə, “Qızıl qələm” mükafatı laureatı Zərəngiz Dəmirçi Qayalının Xocalı faciəsindən bəhs edən “Cavab ver” poeması əsasında səhnələşdirilmiş tamaşa göstərilmişdir.
Üzeyir Hacıbəylinin ev-muzeyinin direktoru, bəstəkar, əməkdar incəsənət xadimi Sərdar Fərəcov, şairə, əməkdar incəsənət xadimi Kəmalə Ağayeva, “Aytam” Uşaqların Mədəni Maariflənməsi İctimai Birliyinin (UMM İB) sədri Aygün Zamanlı 1992-ci il fevralın 25-dən 26-na keçən gecə Xocalıda soyqırımı törətmiş erməniləri lənətləmişlər. Bəşər tarixində görünməmiş vəhşiliklə müşayiət olunan, qocaya, qadına, körpəyə belə rəhm etmədən törədilən qırğınları yaddan çıxarmamaq üçün belə anma mərasimlərinin tez-tez keçirilməsinin vacibliyi vurğulanmışdır.
Qeyd edilmişdir ki, Xocalı faciəsi heç zaman unudulmamalı, ermənilərin mənfur siyasətlərinin qurbanı olan şəhidlərin əziz xatirəsi qələbəyə gedən yolda xalqımıza güc verməlidir.
“Günay” uşaq teatrı və “Aytam” UMM İB üzvlərinin ifasında səhnələşdirilmiş tamaşanın rejissoru Larisa Tarusova, bədii rəhbəri Günəş Talıblıdır.
Bölmənin digər xəbərləri
