Xocalı – susqun dünyanın vicdan yarası
Goranboy, 26 fevral, Rauf Hacıyev, AZƏRTAC
Fevralın 26-da respublikamızın bütün bölgələrində olduğu kimi, Goranboy rayonunda da xocalıların müvəqqəti məskunlaşdığı Yeni yaşayış massivində və kompakt şəkildə yaşadıqları Aşağı Ağcakənd qəsəbəsində Xocalı soyqırımının 29-cu ildönümü ilə əlaqədar anım mərasimi keçirilib.
Anım mərasimlərində Xocalı Rayon İcra Hakimiyyətinin başçısı Şahmar Usubov, Goranboy Rayon İcra Hakimiyyətinin başçısı Məhərrəm Quliyev, aparatının məsul işçiləri, hüquq-mühafizə orqanlarının, idarə və müəssisələrin rəhbərləri və rayon ictimaiyyəti iştirak edib.
AZƏRTAC-ın bölgə müxbiri xəbər verir ki, mərasim iştirakçıları Yeni yaşayış massivində və Aşağı Ağcakənd qəsəbəsində Xocalı soyqırımı qurbanlarının xatirəsinə ucaldılmış abidə önünə gül dəstələri düzüb, şəhidlərimizə Allahdan rəhmət diləyiblər.
Xocalı Rayon İcra Hakimiyyəti başçısının müavini Lamiyə Qarayeva bildirib ki, ermənilərin bu soyqırımını törətmələrinin əsas səbəblərindən biri Xocalının strateji mövqedə yerləşməsi, digər səbəbi isə Dağlıq Qarabağda yeganə mülki hava limanının Xocalıda olması idi. Erməni quldurlarının Xocalını yerlə-yeksan etməkdə məqsədi tarixi Azərbaycan torpaqlarını ələ keçirmək, xalqımızın azadlıq əzmini, eləcə də torpaqlarımızın azadlığı uğrunda mübarizə əzmini qırmaq idi. Xocalı soyqırımı zamanı şəhər əhalisi deportasiyaya məruz qalmışdır.
Hərbi təcavüz nəticəsində 613 nəfər, o cümlədən 106 qadın, 63 azyaşlı uşaq, 70 qoca öldürülüb. Mindən çox dinc sakin, o cümlədən 76 uşaq müxtəlif dərəcəli güllə yarası alaraq şikəst olub. 1275 nəfər əsir götürülüb, 8 ailə bütövlüklə məhv edilib. 25 uşaq hər iki valideynini, 130 uşaq valideynlərindən birini itirib. 56 nəfər xüsusi qəddarlıq və amansızlıqla diri-diri yandırılıb, başlarının dərisi soyulub, gözləri çıxarılıb, başları kəsilib, hamilə qadınların qarnı süngü ilə deşilib.
Azərbaycan xalqı böyük bir müsibət yaşayıb. Dinc sakinlərin qanına susamış erməni cəlladları bir gecənin içində aman demədən yüzlərlə günahsız insanın qanını axıdıblar. Hər tərəfi bürüyən bəyaz qar axıdılan məsum insanların qanından al qırmızıya boyanıb. Bir gecədə bütöv bir şəhər Yer üzündən silinib. Ermənilər bu soyqırımı ilə dünyanın ən qəddar yırtıcılarından, vəhşilərindən heç nə ilə fərqlənmədiklərini, əksinə, daha qaniçən olduqlarını bir daha göstəriblər.
Xocalı soyqırımının şahidlərindən olan Şükür Bəşirov faciənin dəhşətlərindən danışıb, 29 il əvvəl törədilmiş faciənin ağrı-acısını hər zaman qəlbində daşıdığını deyib: “İlk dəfə 1997-ci ildə ümummilli lider Heydər Əliyev qarşısında çıxış edərkən işğal olunmuş torpaqlarımızın geri qaytarılacağı günü arzulamışdım. O zaman Ulu Öndər məni dinlədikdən sonra dedi ki, vaxt gələcək bizim bütün torpaqlarımız işğaldan azad ediləcək. Xocalı faciəsi baş verən gündən nəinki, xocalılılar, eyni zamanda, bütün Azərbaycan xalqı bu faciənin günahsız qurbanlarının qisasının alınacağı günü gözləyirdi. Nəhayət, o gün gəldi və Müzəffər Ali Baş Komandanımız İlham Əliyevin əzmi, iradəsi ilə qəhrəman Azərbaycan Ordusu 44 günlük Vətən müharibəsində böyük şücaət göstərərək düşmənə sarsıdıcı zərbə vurdu və Xocalı qurbanlarının qisasını aldı. Bu da Xocalı faciəsinin bütün şahidləri üçün böyük bir təsəllidir. İndi həm Azərbaycan xalqı, həm də ordumuz qalibdir. Ona görə bütün xocalılılar kimi mən də Xocalı qurbanlarının xatirəsinə ucaldılmış bu abidəni hər il olduğu kimi, böyük kədər və hüzn hissi ilə deyil, böyük qələbə ruhu ilə ziyarətə gəlmişik. Qələbəmiz münasibətilə çox sevinir, şəhidlərimizə Allahdan rəhmət, onların valideynlərinə və ailələrinə səbir, yaralı qazilərimizə şəfa diləyirəm. Biz xocalılılar tezliklə doğma yurd yerimizə qayıdacağımız günü gözləyirik.
Bölmənin digər xəbərləri
