XOCALI FACİƏSİ DÜNYADA TÖRƏDİLMİŞ ƏN AĞIR CİNAYƏTDİR
Ağsu, 26 fevral (AZƏRTAC). Rayonun bütün ümumtəhsil məktəblərində ilk dərslər Xocalı soyqırımına həsr olunmuşdur. Faciənin 17-ci ildönümü ilə əlaqədar rayon mərkəzində və kənd yaşayış məntəqələrində kütləvi tədbirlər keçirilmişdir. “Qəhrəmanlar parkı”ndakı abidə önünə əklil və çiçəklər qoyulmuş, soyqırımı qurbanlarının ruhuna dualar oxunmuşdur.
Xocalı soyqırımının ildönümü ilə bağlı keçirilən ümumrayon yığıncağında faciə qurbanlarının xatirəsi bir dəqiqəlik sükutla yad edilmişdir.
Rayon icra hakimiyyətinin başçısı Ənvər Seyidəliyev, Xocalı sakini Əmrah Məmmədov və başqaları çıxışlarında Xocalı faciəsini dünyada törədilmiş ən ağır cinayət kimi qiymətləndirmişlər. Bildirilmişdir ki, Xocalı faciəsi erməni millətçiləri tərəfindən xalqımıza qarşı zaman-zaman aparılan etnik təmizləmə və soyqırımı siyasətinin qanlı səhifəsidir. Ötən əsrin 80-ci illərinin sonlarında təcavüzkar erməni millətçilərinin irəli sürdükləri ərazi iddiaları azərbaycanlıların qədim torpaqlarından kütləvi deportasiyasına, çoxsaylı terror aktlarına və amansız müharibəyə səbəb olmuşdur. Azərbaycan xalqı bu faciəni heç vaxt unutmayacaqdır.
Bölmənin digər xəbərləri
