XOCALI FACİƏSİ İLƏ BAĞLI MƏLUMATLAR BEYNƏLXALQ TƏŞKİLATLARIN ELEKTRON ÜNVANLARINA GÖNDƏRİLMİŞDİR
Bakı, 26 fevral (AZƏRTAC). “İRƏLİ” İctimai Birliyi gənclərə vətənpərvərlik ruhunun aşılanması və milli mənəvi dəyərlərin qorunması, Vətənə sevgi hisslərinin artırılması istiqamətində fəaliyyətinin davamı olaraq Qaradağ rayon 319 nömrəli orta məktəbdə Xocalı soyqırımının 17-ci ildönümü ilə bağlı tədbir keçirmişdir.
Xocalı faciəsi qurbanlarının xatirəsi bir dəqiqəlik sükutla yad edilmişdir.
“İRƏLİ”nin nümayəndəsi Musa Qurbanov ermənilərin əsrlər boyu ərazilərimizə təcavüz etdiyini, dinc sakinləri vəhşicəsinə qətlə yetirdiyini, əsir və girov götürdüyünü faktlarla xatırlatmış, bu soyqırımı faktının dünya ictimaiyyətinə çatdırılmasında ümummilli lider Heydər Əliyevin müstəsna xidmətlərini vurğulamışdır.
Soyqırımın ildönümü ilə bağlı “İRƏLİ” tərəfindən ingilis, fransız, italyan və alman dillərində hazırlanmış məlumatlar dünyanın aparıcı ölkələrinin hökumət rəhbərlərinin, konqresmenlərin, senatorların, beynəlxalq təşkilatların elektron ünvanlarına göndərilmişdir.
Tədbirdə gənclərin hazırladığı videosüjetlər nümayiş etdirilmiş, şagirdlərə faciənin tarixindən bəhs edən bukletlər paylanmışdır.
Bölmənin digər xəbərləri
