XOCALI FACİƏSİ QURBANLARININ XATİRƏSİ PAKİSTANDA ANILMIŞDIR
Bakı, 26 fevral (AZƏRTAC). Azərbaycanın Pakistandakı səfirliyindən bildirmişlər ki, 1992-ci ilin fevralında Azərbaycana qarşı törədilmiş qanlı terror aktının 17-ci ildönümü Pakistanda qeyd edilmişdir.
Fevralın 26-da Azərbaycanın Pakistandakı səfiri Eynulla Mədətlinin, Azərbaycan Diplomatik Akademiyasının akademik məsələlər üzrə dekan müavini Taleh Ziyadovun və səfirliyin əməkdaşlarının iştirakı ilə Pakistanın Regional Tədqiqatlar İnstitutunda mövzu ilə bağlı dəyirmi masa keçirilmişdir.
İnstitutun rəhbərliyi və işçi heyəti ilə yanaşı, səfirlərin, tədqiqatçıların, ziyalıların da iştirak etdikləri tədbirdə Ermənistanın törətdiyi qanlı cinayət barədə məlumat verilmiş, Xocalı şəhidlərinin əziz xatirəsi birdəqiqəlik sükutla yad edilmişdir. Bundan əlavə, Xocalı soyqırımına dair Heydər Əliyev Fondunun hazırladığı kitablar, audio-video materiallar, fotoşəkillər nümayiş etdirilmişdir.
Səfir E.Mədətli Azərbaycanın xarici siyasəti, Ermənistanın Azərbaycana qarşı təcavüzü haqqında məlumat vermişdir.
Taleh Ziyadov Azərbaycanın regionda və dünyada enerji təhlükəsizliyinin təmin olunmasındakı rolu barədə məruzə etmişdir.
Tədbir mövzu ilə bağlı müzakirələrlə davam etmişdir.
Ermənistanın Xocalıda törətdiyi bu cinayət Pakistanın nüfuzlu “Observer” və “Daily İttehad” qəzetlərinin 26 fevral tarixli saylarında geniş işıqlandırılmışdır. Məqalələrdə faciəni əks etdirən fotoşəkillər təqdim olunmuşdur.
Həmin gün Azərbaycan səfirliyində İslamabadda yaşayan azərbaycanlıların və Pakistan ictimaiyyəti nümayəndələrinin iştirakı ilə Xocalı qurbanlarının xatirəsini anma mərasimi də keçirilmişdir.
Bölmənin digər xəbərləri
