XOCALI FACİƏSİ XX ƏSRİN DƏHŞƏTLİ QƏTLİAMIDIR
Bakı, 27 fevral (AZƏRTAC). M.S.Ordubadinin xatirə muzeyində Xocali faciəsinin 17-ci ildönümü ilə əlaqədar keçirilən tədbirdə soyqırımı qurbanlarının xatirəsi birdəqiqəlik sükutla yad edilmişdir.
Muzeyin direkroru Lalə Abbaszadə, “Aytam” Uşaqların Mədəni Maariflənməsi İctimai Birliyinin sədri Aygün Zamanlı bildirmişlər ki, Xocalı soyqırımı bəşər tarixinə XX əsrin ən dəhşətli qətliamı kimi daxil olmuşdur. Azərbaycanlılar 200 il ərzində davamlı olaraq erməni millətçilərinin etnik təmizləmə siyasətinə məruz qalmış, nəticədə xalqımız tarixi torpaqlarından qovulmuş, qaçqına, məcburi köçkünə çevrilmişdir. Bütün bunlar ermənilər tərəfindən kütləvi qırğınlarla müşayiət olunmuşdur.
1992-ci il fevralın 25-dən 26-na keçən gecə sovet ordusunun Xankəndidə yerləşən 366-cı motoatıcı alayının zirehli texnikasının köməyi ilə ermənilər qadınları, uşaqları, qocaları qəddarcasına qətlə yetirmişlər.
Çıxış edənlər vurğulamışlar ki, ulu öndər Heydər Əliyevin Xocalı soyqırımının beynəlxalq aləmdə tanıdılması, erməni faşizminin ifşası ilə əlaqədar 1994-cü il fevralın 24-də Ali Sovetdə “Xocalı Soyqırımı Genosidi Günü haqqında” qərar qəbul edilmişdir.
Sonda Xocalı faciəsindən bəhs edən ədəbi kompozisiya göstərilmişdir.
Bölmənin digər xəbərləri
