XOCALI FACİƏSİNƏ HƏSR OLUNMUŞ KİTABLARIN SƏRGİSİ KEÇİRİLMİŞDİR
Bakı, 26 fevral (AZƏRTAC). M.F.Axundov adına Azərbaycan Milli Kitabxanasında Xocalı faciəsinin 17-ci ildönümü ilə bağlı silsilə tədbirlər keçirilmişdir.
Kitabxananın sərgi salonunda Xocalıya, Qarabağa, ümumiyyətlə, son dövr faciələrimizə həsr olunmuş 200-ə yaxın kitab, jurnal və toplular nümayiş etdirilmişdir.
Sərgidə, həmçinin Mədəniyyət və Turizm Nazirliyi və Milli Kitabxananın birgə layihəsi ilə nəşr olunmuş “Azərbaycan Milli Qəhrəmanları” Biblioqrafik məlumat kitabının və şair Ədalət Əsgəroğlunun 4 dildə çıxmış “Dərdimizin qan rəngi” kitabının təqdimatı keçirilmişdir.
Kitabxananın direktoru Kərim Tahirov, faciənin şahidləri və digər çıxış edənlər XX əsrin ən qanlı faciəsi olan Xocalı qırğınının dəhşətlərindən danışmışlar. Yüzlərlə dinc, əliyalın sakin - qoca, uşaq və qadınların ermənilər tərəfindən vəhşicəsinə qətlə yetirilməsi təkcə Azərbaycan xalqına deyil, bütövlükdə insanlığa qarşı törədilmiş ən qəddar cinayət adlandırılmışdır.
Bölmənin digər xəbərləri
