XOCALI FACİƏSİNİN 17-Cİ İLDÖNÜMÜ AĞCABƏDİDƏ SİLSİLƏ TƏDBİRLƏRLƏ QEYD EDİLMİŞDİR
Ağcabədi, 26 fevral (AZƏRTAC). Xocalı faciəsinin 17-ci ildönümü Ağcabədi rayonunda silsilə tədbirlərlə qeyd edilmişdir.
Yeni Azərbaycan Partiyası rayon təşkilatının Gənclər Birliyinin xətti ilə məktəblilər arasında rəsm müsabiqəsi, Qarabağ Muğam Mərkəzində Heydər Əliyev Muzeyinin əməkdaşları ilə birlikdə “Xocalı əsrin faciəsidir” mövzusunda anma mərasimi keçirilmişdir. Bütün müəssisə və təşkilatlarda, əmək kollektivlərində yığıncaqlar keçirilmiş, faciə qurbanlarının xatirəsi anılmışdır.
Soyqırımının ildönümü münasibətiilə Azərbaycan Müəllimlər İnstitutunun (AMİ) Ağcabədi filialında keçirilmiş tədbirdə filialın direktoru professor Xaqani Məmmədov, müəllim və tələbələr çıxış edərək qanlı faciə barədə danışmış, Xocalıda törədilənləri bəşəriyyətə qarşı ən amansız cinayət adlandırmışlar. Tədbirdə soyqırımına dair videofilm və tələbələr tərəfindən hazırlanmış ədəbi-bədii kompozisiya nümayiş etdirilmişdir.
Rayon polis şöbəsində keçirilən anma mərasimində rəis, polkovnik Təhmasib İbrahimov, AMİ filialının müəllimi, tarix elmləri namizədi Tahir Kərimli, rayon tarix-diyarşunaslıq muzeyinin direktoru Elmira Adıgözəlova, Xocalı sakini, polis serjantı Şəmsəddin Məmmədov erməni millətçilərinin xalqımızın başına gətirdiyi müsibətlərdən, o cümlədən Xocalıda törədilən vəhşiliklərdən danışmışlar.
Fevralın 26-da Ağcabədi şəhərində ümumrayon tədbiri keçirilmişdir.
Mərasim iştirakçıları əvvəlcə Şəhidlər xiyabanında Azərbaycanın ərazi bütövlüyü uğrunda canından keçmiş Vətən övladlarının xatirəsinə ucaldılmış abidə önünə çiçəklər düzmüş, şəhidlərin ruhuna dualar oxunmuşdur. Tədbir mədəniyyət evində rayon mədəniyyət və turizm şöbəsi tərəfindən hazırlanmış ədəbi-bədii kompozisiya və faciəyə həsr olunmuş filmin nümayişi ilə başa çatmışdır.
Xocalıdan olan şəhid ailələrinə rayon icra hakimiyyəti tərəfindən maddi yardım edilmişdir.
Bölmənin digər xəbərləri
