QAN YADDAŞI
XOCALI QƏTLİAMININ 17-Cİ İLDÖNÜMÜ MDB ÖLKƏLƏRİNDƏ QEYD EDİLƏCƏKDİR
Bakı, 23 fevral (AZƏRTAC). Diaspor ilə İş üzrə Dövlət Komitəsindən bildirmişlər ki, Xocalı soyqırımının 17-ci ildönümü ilə əlaqədar MDB ölkələrində keçiriləcək anma tədbirlərində Heydər Əliyev Fondunun təbliğat materiallarından geniş istifadə ediləcəkdir.
Gürcüstanın Marneuli şəhərində Azərbaycan Mədəniyyət Mərkəzi Azərbaycanın bu ölkədəki səfirliyi ilə birlikdə Xocalı faciəsinə həsr olunmuş “dəyirmi masa” keçirəcəkdir. Fevralın 26-da Tbilisidə Gürcüstan Azərbaycanlıları Konqresi səfirliklə birgə Xocalı soyqırımı ilə bağlı elmi praktik konfrans təşkil edəcəkdir.
Özbəkistanın Daşkənd şəhərində Azərbaycan Mədəniyyət Mərkəzləri Assosiasiyası faciə qurbanlarının xatirəsini yad edəcəkdir.
Qazaxıstanın Astana şəhərində “Xəzər” İctimai Birliyi, Aktau şəhərində isə “Dostluq” Azərbaycan Mədəniyyət Mərkəzi ilə “Turan” Konqresi Xocalı soyqırımı ilə bağlı tədbirlər keçirəcəklər. Hər iki tədbir fevralın 26-na təyin edilmişdir.
Qırğızıstanda fəaliyyət göstərən “Azəri” İctimai Birliyi və “Türk Dünyasının Siyasətinə Dəstək” İctimai Fondu birlikdə anma tədbiri keçirəcəklər.
Ümumrusiya Azərbaycan Konqresi fevralın 26-da Moskva şəhərindəki “Bakı” kinoteatrında Xocalı qətliamına həsr edilmiş toplantı keçirməyi və Heydər Əliyev Fondunun hazırladığı sənədli filmin nümayişini nəzərdə tutmuşdur. Həmin gün Sankt-Peterburq, Yekaterinburq, Samara, Tula, Ufa, Novosibirsk, Ulan-Ude, Xabarovsk və Rusiyanın digər şəhərlərində də Ümumrusiya Azərbaycan Konqresinin regional nümayəndəlikləri Xocalı soyqırımının ildönümünü qeyd edəcəklər.
Kiyevdə fevralın 25-də Ukrayna Azərbaycan Konqresinin təşkilatçılığı ilə azərbaycanlı rəssam Rasim Səydiyevin Xocalı soyqırımına həsr etdiyi əsərlərinin sərgisi nümayiş etdiriləcəkdir. Bu sərgi Xarkov, Dnepropetrovsk şəhərlərində də ictimaiyyətə təqdim olunacaqdır. Fevralın 26-da isə Kiyevdə və Ukraynanın bir neçə şəhərində yaşayan azərbaycanlılar Ermənistanın bu ölkədəki səfirliyinin binası qarşısında piket keçirəcəklər. Eyni zamanda, ATƏT-in Ukraynadakı nümayəndəliyinin binası önündə də piket keçirilməsi və Xocalı soyqırımı ilə bağlı qətnamə qəbul edilməsi nəzərdə tutulmuşdur. Həmin sənəd BMT-nin Ukraynadakı nümayəndəliyinə də təqdim olunacaqdır. Həmçinin Ukraynanın Kiyev, Xarkov, Donetsk, Dnepropetrovsk və digər şəhərlərində faciənin ildönümü ilə əlaqədar “dəyirmi masa”lar və digər anma mərasimləri keçiriləcəkdir.
Fevralın 26-da Xocalı soyqırımının 17-cı ildönümü qurbanlarının xatirəsi Azərbaycanın Belarusdakı səfirliyinin və Belarus-Azərbaycan İcmaları Konqresinin təşkilatçılığı ilə Minsk şəhərində də anılacaq, “dəyirmi masa” keçiriləcək, Xocalı qətliamına həsr olunmuş sənədli film nümayiş etdiriləcəkdir.