XOCALI SOYQIRIMI AZƏRBAYCAN XALQININ TARİXİNDƏ ƏN DƏHŞƏTLİ FACİƏLƏRDƏN BİRİDİR
Bakı, 26 fevral (AZƏRTAC). Şirvan Apellyasiya Məhkəməsində Xocalı faciəsinin 17-ci ildönümü ilə bağlı tədbir keçirilmişdir.
Əvvəlcə faciə qurbanlarının xatirəsi bir dəqiqəlik sükutla yad edilmişdir.
Məhkəmənin sədri Qürbət Əsgərov Xocalı soyqırımının törədildiyi dövrdə baş verən hadisələrdən danışaraq bildirmişdir ki, bu faciə Azərbaycan xalqının tarixində ən dəhşətli faciələrdən biridir.
Sədr demişdir ki, XX əsrin sonunda dünya ictimaiyyətinin gözü qarşısında baş vermiş belə kütləvi qırğın hadisəsi öz amansızlığına və qəddarlığına görə təkcə Azərbaycan xalqına qarşı deyil, bütövlükdə bəşəriyyətə və insanlığa qarşı törədilmiş qanlı cinayət idi. Bu gün artıq heç kimə sirr deyil ki, Xocalı faciəsi erməni millətçilərinin yüzilliklər boyu türk və Azərbaycan xalqlarına qarşı apardığı soyqırımı və etnik təmizləmə siyasətinin qanlı səhifəsi idi. Bu məkrli siyasətlə erməni millətçiləri xalqımızın mübarizə əzmini qırmaq, onu tarixi torpaqlarının işğalı faktı ilə barışmağa məcbur etmək istəyirdilər. Lakin düşmənlərimizin niyyəti baş tutmadı. Məhz ümummilli liderimizin hakimiyyətə qayıdışından sonra Xocalı faciəsi özünün əsl siyasi-hüquqi qiymətini aldı. Soyqırımı haqqında həqiqətlərin dünya beynəlxalq ictimaiyyətə çatdırılması üçün təsirli tədbirlər görüldü.
Bölmənin digər xəbərləri
