Xocalı soyqırımı heç zaman unudulmayacaq
Şamaxı, 25 fevral, AZƏRTAC
Şamaxı Rayon Tarix-Diyarşünaslıq Muzeyində XX əsrin ən dəhşətli faciələrindən olan Xocalı soyqırımının 23-cü ildönümü anılıb.
AZƏRTAC xəbər verir ki, Şamaxı şəhər 1 saylı tam orta məktəbin şagirdlərinin iştirak etdikləri tədbirdə muzeyin direktoru Firqiyə Zamanova və kiçik elmi işçi Zərifə Baxşıyeva 23 il əvvəl Xocalıda baş verən qətliamdan danışıblar.
Bildirilib ki, 1992-ci il fevralın 25-dən 26-na keçən gecə erməni silahlı dəstələri keçmiş SSRİ-nin 366-cı motoatıcı alayının zabit və əsgərlərinin köməyi ilə Xocalı şəhərinə hücum edib, dinc, silahsız əhaliyə qarşı xüsusi qəddarlıqla müşayiət olunan soyqırımı həyata keçiriblər. Qırğın zamanı 613 nəfər dinc sakin, o cümlədən 63 nəfər uşaq, 106 nəfər qadın, 70 nəfər qoca xüsusi amansızlıqla öldürülüb, 8 ailə bütünlüklə məhv edilib.
Tədbirdə Xocalı soyqırımının heç zaman unudulmayacağına və dünyada öz hüquqi qiymətini alacağına əminlik ifadə olunub.
Sonda Xocalı soyqırımından bəhs edən sənədli film nümayiş etdirilib.
Bölmənin digər xəbərləri
