XOCALI SOYQIRIMI QAN YADDAŞIMIZA ƏBƏDİ HƏKK OLUNMUŞDUR
Bakı, 24 fevral (AZƏRTAC). Azərbaycan Dövlət Pedaqoji Universitetində (ADPU) Xocalı faciəsinin 17-ci ildönümünə həsr edilmiş tədbir keçirilmişdir.
ADPU-nun prorektoru, professor Rafiq Baxşəliyev qəsbkar ermənilərin zaman-zaman işğalçılıq siyasəti apararaq, torpaqlarımızda günahsız qanlar axıtdıqlarını bildirmişdir.
1992-ci il fevralın 25-dən 26-na keçən gecə Xocalıda erməni cəlladlarının törətdikləri qanlı hadisələrdən bəhs edən natiq diqqətə çatdırmışdır ki, bu faciə zamanı 613 nəfər, o cümlədən 106 qadın, 63 uşaq vəhşicəsinə qətlə yetirilmişdir. Şəhər və kəndlərimiz, qəsəbələrimiz düşmən tərəfindən talan olunmuşdur.
Erməni terrorizminin bəşəriyyət üçün təhlükəli bəla olduğunu qeyd edən professor R.Baxşəliyev fevralın 26-da ADPU-nun bütün fakültələrində ilk dərslərin Xocalı soyqırımına həsr ediləcəyini də nəzərə çarpdırmışdır.
Digər çıxış edənlər də Xocalı qırğınının qan yaddaşımıza əbədi həkk olunduğunu, tökülən günahsız qanların yerdə qalmayacağını söyləmişlər.
Sonra mövzu ilə bağlı ədəbi-bədii kompozisiya nümayiş etdirilmişdir.
Bölmənin digər xəbərləri
