XOCALI SOYQIRIMI QURBANLARININ XATİRƏSİ LİTVADA DA ANILMIŞDIR
AZƏRTAC xəbər verir ki, fevralın 26-da Azərbaycanın Litvadakı səfirliyi Vilnüsdəki Zabitlər Evində Xocalı soyqırımının 16-cı ildönümü ilə bağlı anma mərasimi təşkil etmişdir.
Səfirlikdən verilən məlumata görə, tədbirdə Litvanın hökumət nümayəndələri, soydaşlarımız, tatar, yəhudi və çeçen icmalarının nümayəndələri iştirak etmişlər.
Azərbaycan səfiri Nairə Şahtaxtinskaya Xocalı faciəsi haqqında ətraflı məlumat vermiş, erməni millətçilərinin xalqımıza qarşı həyata keçirdikləri soyqırımı və etnik təmizləmə siyasətinin bəşəri dəyərlər üçün böyük təhlükə mənbəyi olduğunu vurğulamışdır.
Litvanın hökumət nümayəndələri və icma rəhbərləri soyqırımı cinayətləri və etnik təmizləmə siyasətinin müasir dövrümüzdə yolverilməz olduğunu qeyd etmişlər.
Xocalı soyqırımına həsr edilmiş sənədli filmin, fotoşəkillərin nümayiş olunduğu tədbirin iştirakçılarına Ermənistanın Azərbaycana hərbi təcavüzündən, qaçqın və məcburi köçkünlərin ağır həyat şəraitindən bəhs edən kitablar və DVD paylanmışdır.
Mərasimdə Xocalı soyqırımının qurbanlarının ruhuna dualar oxunmuş, səfirlik adından ehsan verilmişdir.
Bundan əlavə, Azərbaycan səfirliyinin dəstəyi ilə geniş oxucu kütləsinə malik olan gündəlik “Respublika” qəzetində Xocalı soyqırımından bəhs edən məqalə dərc edilmişdir.
Bölmənin digər xəbərləri
