XOCALI SOYQIRIMI QURBANLARININ XATİRƏSİ YAD EDİLMİŞDİR
Bakı, 25 fevral (AZƏRTAC). AMEA-nın Milli Azərbaycan Tarixi Muzeyində fevralın 25-də Xocal faciəsinin 17-ci ildönümü münasibətilə anma tədbiri keçirilmişdir.
Muzeyin elmi-maarif şöbəsinin müdiri, tarix elmləri namizədi Bəhmən Kərimov faciənin başvermə səbəblərindən danışmış, erməni daşnaklarının zaman-zaman Azərbaycan xalqının başına gətirdiyi müsibətlərdən söz açmışdır.
Vurğulanmışdır ki, belə anma mərasimlərinin keçirilməsi gənc nəslin millətimizin başına gətirilən faciələri unutmaması, onların tariximizi yaxşı öyrənmələri və beynəlxalq ictimaiyyətin Xocalı soyqırımına biganə qalmaması baxımından əhəmiyyətlidir.
Tədbirdə digər çıxış edənlər XX əsrin əvvəllərindən başlayaraq Azərbaycana qarşı daim ərazi iddiaları irəli sürən Ermənistanın işğalçılıq müharibəsi apardığını, əzəli Azərbaycan torpaqlarında etnik təmizləmə siyasəti yürütdüyünü bildirmiş, lakin beynəlxalq ictimaiyyətin bir çox hallarda bu hadisələrə biganə qaldıqlarını təəssüflə qeyd etmişlər.
Anım mərsimində Xocalı soyqırımına aid fotoşəkillərdən ibarət slayd və sənədli film nümayiş etdirilmişdir.
Sonda Binəqədi rayonundakı 244 nömrəli orta məktəbin şagirdləri faciəni əks etdirən ədəbi-bədii kompozisiya ilə çıxış etmişlər.
Bölmənin digər xəbərləri
