“XOCALI SOYQIRIMI RABİTƏÇİLƏRİN YADDAŞINDA” KİTABI NƏŞR EDİLMİŞDİR
Bakı, 25 fevral (AZƏRTAC). Rabitə və İnformasiya Texnologiyaları Nazirliyi tərəfindən “Xocalı soyqırımı rabitəçilərin yaddaşında” adlı kitab çap edilmişdir.
Kitabda 1992-ci ilin qarlı fevral günlərində erməni silahlı quldurlarının sovet hərbi alayı ilə birlikdə Azərbaycanın Xocalı şəhərinə hücumu nəticəsində şəhərin işğal edildiyi son anadək öz vəzifə borclarını fədakarlıqla yerinə yetirmiş rabitəçilərin başına gələn müsibətlərdən danışılır. Yeni nəşrdə silahsız insanların, xəstə qocaların, uşaqların zülmət gecədə buz bağlamış çaydan keçərək qarlı dağlara, meşələrə üz tutmasından, dəhşətli iztirablara düçar olmuş xocalıların faciəsindən söz açılır.
Ulu öndər Heydər Əliyevin Xocalı soyqırımı ilə əlaqədar çıxışlarından parçalar, imzaladığı sərəncamlar, Prezident İlham Əliyevin soyqırımla bağlı xalqa müraciətləri, bir sıra rəsmi sənədlər, Qarabağ tarixi ilə bağlı faktlar, münaqişənin başlanma səbəbləri, xarici ölkələrin nüfuzlu təşkilatlarının və kütləvi informasiya vasitələrinin Xocalı faciəsi barədə xəbərləri kitabda öz əksini tapmışdır.
######
Bölmənin digər xəbərləri
