XOCALI SOYQIRIMI VƏ QARABAĞ MÖVZUSU İLƏ BAĞLI YAZI MÜSABİQƏSİNƏ SƏNƏDLƏRİN QƏBULU DAVAM EDİR
Bakı, 3 dekabr (AZƏRTAC). “Azersun Holdinq”in maliyyə dəstəyi ilə Azərbaycan Mətbuat Şurası və “Xocalı Soyqırımını Tanıtma” İctimai Birliyi tərəfindən Xocalı soyqırımının mediada daha peşəkar işıqlandırılması məqsədi ilə jurnalistlər arasında keçirilən müsabiqəyə sənədlərin qəbulu 2010-cu il fevralın 10-dək davam edəcəkdir.
Mətbuat Şurasından bildirmişlər ki, bu ilin sentyabrından elan edilən müsabiqəyə gələn ilin fevralın 5-dək qəzet, jurnal və informasiya agentliklərində Qarabağ mövzusu və Xocalı faciəsi ilə bağlı yer alan nümunələr təqdim edilə bilər. Materiallar üçün həcm və dil məhdudiyyəti nəzərdə tutulmur. Məqalələr Azərbaycan Mətbuat Şurasına çap və elektron formasında təqdim olunmalıdır.
Qaliblərə mükafatlar 2010-cu il fevralın 24-də Xocalı soyqırımının ildönümü ərəfəsində təqdim olunacaqdır.
Müsabiqədə birinci yer üçün (1 nəfər) 1000 manat, ikinci yer üçün (2 nəfər) 650 manat, üçüncü yer üçün (3 nəfər) 300 manat pul mükafatı nəzərdə tutulmuşdur. Bundan əlavə, 5 nəfərə həvəsləndirici mükafatlar təqdim olunacaqdır.
Müsabiqədə Qarabağ mövzusunun və Xocalı soyqırımının təbliğində yaxından iştirak edən ən yaxşı bir xarici KİV-ə xüsusi diplom təqdim olunacaqdır.
Qalib yazıların ingilis dilinə tərcümə edilərək, müxtəlif KİV-lərdə dərci və informasiya portallarında yerləşdirilməsi nəzərdə tutulmuşdur.
Bölmənin digər xəbərləri
