XOCALI SOYQIRIMINA BEYNƏLXALQ HÜQUQİ QİYMƏT VERİLMƏMƏSİ TƏƏSSÜF DOĞURAN HALDIR
Dəməşq, 26 fevral (AZƏRTAC). Azərbaycanın Suriya Ərəb Respublikasındakı səfirliyində bu ölkədə yaşayan azərbaycanlıların, tarixən burada məskunlaşmış türkmən icmasının nümayəndələrinin iştirakı ilə Xocalı faciəsinin 17-ci ildönümü ilə əlaqədar anma mərasimi keçirilmişdir.
Şəhidlərimizin xatirəsi birdəqiqəlik sükutla yad edilmiş, həlak olanların ruhuna yasin oxunmuşdur.
Səfir Mahir Əliyev Xocalı soyqırımı barədə ətraflı məlumat vermiş, xalqımıza qarşı tarixən nifrət və düşmənçilik hissləri bəsləyən ermənilərin Xocalı sakinlərini tamamilə məhv etmək məqsədlərinin bir çox sənədlərlə təsdiqləndiyini bildirmişdir. Səfir indiyədək dünya ictimaiyyəti və beynəlxalq təşkilatlar tərəfindən faciəyə müvafiq qiymət verilmədiyinin təəssüf doğuran hal olduğunu diqqətə çatdırmışdır.
Tədbir zamanı Heydər Əliyev Fondu tərəfindən hazırlanmış materiallar iştirakçılara paylanılmış, faciə haqqında sənədli film nümayiş etdirilmişdir. Burada Xocalı soyqırımını əks etdirən fotoşəkillərdən ibarət lövhə açılmışdır.
Səfirlik tərəfindən soyqırımı barədə ingilis və ərəb dilində hazırlanmış mətbuat məlumatı Dəməşqdə akkreditə olunmuş diplomatik nümayəndəliklərə, Suriyanın aparıcı mətbuat orqanları olan “Əl-Saura”, “Tişrin” və “Əl-Baas” qəzetlərinə göndərilmişdir.
Bölmənin digər xəbərləri
