XOCALI SUSMAQ BİLMƏYƏN ÜRƏK AĞRIMIZDIR
Bakı, 24 fevral (AZƏRTAC). Biz bu fevral günləri 17 il əvvəl - fevralın 25-dən 26-na keçən gecə törədilmiş və onlarca günahsız insanın - Xocalı şəhəri sakinlərinin həyatına son qoymuş misli görünməmiş qətliamı bir daha ürək ağrısı ilə xatırlayırıq. Nə qədər düşünsək də, şüurumuz bu vəhşiliyi özünü insan adlandıran məxluq tərəfindən törətdildiyini sona qədər qavraya bilmir.
Əfsuslar olsun ki, bu belədir! Xocalı soyqırımının faciəli statistikasını gətirməyəcəyik. Bu, artıq çoxdan bütün dünyaya məlumdur. Yalnız bir məsələni xatırlatmaq istəyirik: erməni silahlı qruplaşmalarından olan barbarların dinc əhaliyə qanlı divan tutmaları ötən əsrdə bəşəriyyət əleyhinə törədilmiş ən dəhşətli cinayətlərdən biri, azərbaycanlıların soyqırımı aktıdır.
Erməni millətçilərinin və onların əlaltılarının törətdikləri Xocalı qətliamından ötən bu illər ərzində AZƏRTAC öz materiallarında möcüzə nəticəsində sağ qalmış xocalılıların ifadələrinə, bu görünməmiş vandalizm aktının təsadüfi şahidləri olmuş xarici jurnalistlərin söylədiklərinə, amansız vəhşiliyi hiddətlə pisləyən bir sıra nəşrlərin yazılarına istinad edərək, dəfələrlə dünya ictimaiyyətini bəşəriyyətə qarşı bu cinayəti pisləməyə çağırmışdır. Hər nə qədər vaxt ötsə də Xocalı faciəsinin günahkarları mütləq məhkəmə qarşısında cavab verməlidirlər. Axı, erməni təcavüzkarlarının törətdiyi cinayət onların, demək olar, 200 il ərzində xalqımıza qarşı apardıqları etnik təmizləmə və soyqırımı siyasətinin daha bir qanlı səhifəsidir və bu cinayətin cəzası zamanla ölçülmür!
Xocalı faciəsinin 17-ci ildönümü ərəfəsində biz yalnız milli mənsubiyyətinə görə dinc insanlara divan tutanları cəzalandırmaq, onları məsuliyyətə cəlb etmək çağırışı ilə bir daha dünya xalqlarına və dövlətlərinə, beynəlxalq qurumlara inam və ümidlə müraciət edirik.
Bəşəriyyət əleyhinə yönəlmiş bu cinayət cəzasız qalmamalıdır!
Bölmənin digər xəbərləri
