YANĞINLAR MADDİ ZİYANLA YANAŞI, EKOLOGİYAYA DA CİDDİ ZƏRBƏ VURUR
Ağsu, 9 iyun (AZƏRTAC). Ağsu Rayon İcra Hakimiyyətinin və Fövqəladə Hallar Nazirliyi Dövlət Yanğın Nəzarəti Xidmətinin Şimal-Qərb Regional Dövlət Yanğın Nəzarəti İdarəsinin birgə təşkilatçılığı ilə yanğın təhlükəsizliyi məsələlərinə həsr olunmuş geniş müşavirə keçirilmişdir.
Müşavirəni giriş sözü ilə açan rayon icra hakimiyyətinin başçısı Ənvər Seyidəliyev kəskin istilərin düşdüyü, yem bitkiləri və taxıl biçini kampaniyalarının başlandığı indiki şəraitdə yanğın ehtimalının artdığını, buna görə də təhlükəsizliyin maksimum təmin olunması məqsədilə qabaqlayıcı tədbirlərin görülməsinin zəruriliyini diqqətə çatdırmışdır.
Rayon icra hakimiyyəti başçısının birinci müavini Rasim Novruzov, Şimal-Qərb Regional Dövlət Yanğın Nəzarəti İdarəsinin rəisi, daxili xidmət polkovnik-leytenantı Məmməd Bağırov, idarənin yanğın nəzarəti şöbəsinin böyük inspektoru, daxili xidmət leytenantı İlham İslamov, Şamaxı Regional Meşə Mühafizəsi və Bərpası Müəssisəsinin direktoru Arif Şirinov, Ağsu rayon prokuroru Salman Məmmədli və başqaları yanğınların külli miqdarda maddi ziyanla yanaşı, ekologiyaya da ciddi zərbə vurduğunu söyləmişlər.
Müşavirədə qeyd olunmuşdur ki, Ağsuda ötən il 21 ağır yanğın hadisəsi baş vermişdir. Yanğın hadisələrinin sayı 2008-ci illə müqayisədə keçən il 40 faiz artmışdır. Təkcə ötənilki yanğın hadisələri nəticəsində 78.798 manat maddi ziyan dəymişdir. Yanğının söndürülməsində ilk dəfə yanğınsöndürən vertolyotdan istifadə olunmuşdur. Ötən il 3 meşə yanğını hadisəsi qeydə alınmışdır. Bunlardan 1-i Şamaxı, 2-si isə Ağsu ərazisindəki meşə sahələrində baş vermişdir.
Çıxış edənlər yanğınların əksər hallarda insanların səhlənkarlığı, yanğın təhlükəsizliyi qaydalarını pozmaları səbəbindən baş verdiyini diqqətə çatdırmışlar. Göstərilmişdir ki, cari mövsümdə 30 min hektardan çox taxıl zəmisinin məhsulu biçiləcəkdir. Hazırda taxıl sahələrində və biçənəklərdə 100-dən çox texnika işləyir. Mexanizatorların təlimatlandırılması, kombayn və traktorların yanğınsöndürən avadanlıqla tam təchiz edilməsi, yol, sahə kənarlarının azı 4-5 metr enində şumlanması, ərazilərdə ehtiyat su mənbələrinin yaradılması, yüksək gərginlikli elektrik xətlərinin mühafizə zonasının təmizlənməsi və s. məsələlər daim diqqət mərkəzində olmalıdır.
Mövsüm ərzində yanğın təhlükəsizliyi məqsədi ilə rayon qərargahının yaradılması, bütün ərazi vahidlərində növbətçilərin ayrılması, könüllü yanğınsöndürən dəstələrin təşkili və onların lazımi ləvazimatlarla təminatı diqqət mərkəzində saxlanılmalıdır.
Müşavirədə bələdiyyə sədrlərinə yanğın təhlükəsizliyinə dair Şimal-Qərb Regional Dövlət Yanğın Nəzarəti İdarəsi tərəfindən hazırlanmış tövsiyələr paylanmışdır.
Bölmənin digər xəbərləri
