YAP QƏBƏLƏ RAYON TƏHSİL İŞÇİLƏRİNİN İLK PARTİYA TƏŞKİLATININ HESABAT KONFRANSI OLMUŞDUR
AZƏRTAC-ın müxbiri xəbər verir ki, yığıncaqda partiya təşkilatının katibi Müxtəsər İsayev hesabat məruzəsi ilə çıxış etmişdir. O, YAP-ın yarandığı 12 il ərzində ən nüfuzlu siyasi partiyaya çevrilməsindən, Azərbaycan xalqının rifah halının yaxşılaşdırılması yolunda xidmətlərindən, həmçinin partiyanın qurucusu, ümummilli liderimiz Heydər Əliyevin ideyalarının dönmədən həyata keçirilməsindən danışmışdır. Partiyanın apardığı ideoloji işlərdən, xalq arasında qazandığı nüfuzdan söz salan natiq, rayon təhsil işçilərinin ilk partiya təşkilatı üzvlərinin sayının artaraq 722 nəfərə çatmasını, onların 70 faizini qadınlar təşkil etməsini xüsusi vurğulamışdır.
Digər çıxış edənlər prezident seçkiləri dövründə partiyanın apardığı təşkilati-siyasi işin səmərəli nəticələrindən, Azərbaycan xalqının böyük oğlu Heydər Əliyev ideyalarının təbliği və öyrənilməsi sahəsində nəzərdə tutulmuş tədbirlər barədə ətraflı danışmışlar. Son dövrlərdə rayonda təhsilin keyfiyyətinin yüksəldilməsində, təhsil islahatının uğurla həyata keçirilməsində, eləcə də aparılan geniş quruculuq, abadlıq işlərində, yeni iş yerlərinin açılmasında ölkəmizin Prezidenti İlham Əliyevin böyük xidmətlərini, diqqət və qayğısını xüsusi nəzərə çatdıran natiqlər bundan sonra da onun ətrafında sıx birləşəcəklərini bildirmişlər.
Konfransın sonunda 11 nəfərdən ibarət idarə heyəti və katib seçilmiş, YAP rayon təşkilatının V konfransına 32 nəfər nümayəndə göstərilmişdir.
Bölmənin digər xəbərləri
