Yapon alimləri qısa müddətdə dəniz suyunda həll olunan plastik hazırlayıblar
Bakı, 4 iyun, AZƏRTAC
Yapon alimləri okeanlarımızı çirkləndirən və canlı təbiətə zərər verən müasir problemin potensial həllini təklif ediblər. Belə ki, onlar dəniz suyunda saatlar ərzində həll olunan plastik hazırlayıblar.
AZƏRTAC “Reuters” agentliyinə istinadla xəbər verir ki, RIKEN Yeni Materialların Tədqiqat Mərkəzinin və Tokio Universitetinin alimlərinin sözlərinə görə, onların yeni materialı daha tez parçalanır və geriyə heç bir iz buraxmır.
Komanda hələ kommersiya planlarını açıqlamasa da, layihənin rəhbəri Takuzo Aida onların araşdırmalarının müxtəlif sahələrdə, o cümlədən qablaşdırma sektorunda böyük maraq yaratdığını deyib.
Birləşmiş Millətlər Təşkilatının Ətraf Mühit Proqramı 2040-cı ilə qədər plastik çirklənmənin üç dəfə artacağını və nəticədə hər il dünya okeanlarına 23-37 milyon ton tullantı atılacağını proqnozlaşdırır.
Takuzo Aida bildirib: “Uşaqlar yaşayacağı planeti seçə bilməzlər. Alimlərin borcu onlara ən yaxşı həyat mühitini təmin etməkdir”.
Onun sözlərinə görə, yeni material neft əsaslı plastik kimi möhkəmdir, lakin duza məruz qaldığı təqdirdə orijinal komponentlərinə parçalanır. Bu komponentlər daha sonra təbii bakteriyalar tərəfindən daha da parçalana bilər. Material su həyatına zərər verə biləcək və qida zəncirinə daxil ola biləcək mikroplastiklərin əmələ gəlməsinin qarşısını alır. Yeni plastik toksik deyil, yanmır və karbon qazı buraxmır.
Bölmənin digər xəbərləri
