YAPONİYA İRAQA MALİYYƏ YARDIMINI TƏXİRƏ SALMAQ NİYYƏTİNDƏDİR

12.04.2004 [22:55]
Çap et
A⁺ A^-

AZƏRTAC xəbər verir ki, Kiodo Susin agentliyinin hökumətdəki mənbələrə istinadla yaydığı məlumata görə, Yaponiya İraqda vəziyyətin pisləşməsi ilə əlaqədar bu ölkəyə maliyyə yardımı göstərilməsini təxirə salmaq niyyətindədir.

Həmin mənbələr bildirmişlər ki, İraqla münasibətlər saxlanmasını təmin edən Yaponiyanın İordaniyadakı səfirliyi son vaxtlar ancaq oğurlanmış üç yaponiyalının problemi ilə məşğuldur və ona görə də bu ölkəyə hər hansı yardım göstərilməsi dayandırılmışdır. Bundan əlavə, yaponiyalı sahibkarlar İraqa gəlməkdən çəkinirlər ki, bu da Yaponiya firmalarının orada işləməsini mümkünsüz edir.

Yaponiya İraqa yardımın həcminə görə ABŞ-dan sonra ikinci yeri tutur. Tokio müxtəlif layihələrə, o cümlədən su təmizləyən qurğular tikilməsinə və yardımçı transformator stansiyaları alınmasına təmənnasız olaraq 850 milyon dollar ayırmışdır.

Yaponiya İraqa yaxın dörd ildə 5 milyard, cari ildə isə 1,5 milyard dollar ayırmaq niyyətində idi.