Yaponiya saytı: Türkiyənin Azərbaycana suriyalı muzdlular göndərməsi barədə məlumat yalandır
Tokio, 30 sentyabr, AZƏRTAC
Türkiyənin Azərbaycana suriyalı muzdlular göndərməsi barədə məlumatlar həqiqətə uyğun deyil.
AZƏRTAC xəbər verir ki, bu fikir Yaponiyanın news.yahoo.co.jp saytının sentyabrın 30-da yaydığı Tokio Universitetinin professoru Hiroyuki Aoyamanın “Mürəkkəb informasiya və Türkiyə tərəfindən Azərbaycana göndərilən suriyalı muzdlular barədə təbliğat” adlı analitik məqaləsində öz əksini tapıb.
Məqalədə professor sentyabrın 27-dən Ermənistanla Azərbaycan arasında Dağlıq Qarabağ uğrunda başlanan qarşıdurma barədə yapon oxuculara məlumat verir. Qeyd edir ki, ağır artilleriyanın, iri çaplı silahların tətbiq olunduğu döyüşlər sentyabrın 28-də və 29-da da davam edib və nəticədə mülki vətəndaşlar da daxil olmaqla 100-ə yaxın insan həlak olub.
Müəllif yazır ki, Ermənistan tərəfi həmin döyüşlərdə Türkiyənin dəstəklədiyi Azad Suriya Ordusunun muzdlularının da iştirak etdiyini bəyan edib. Azərbaycan Prezidentinin köməkçisi Hikmət Hacıyevin “Reuters” agentliyinə müsahibəsindən sitat gətirən professor yazır: “Suriyanın Azərbaycana muzdlular göndərməsi barədə şayiələr erməni tərəfinin növbəti təxribatıdır”.
Azərbaycan Respublikası Müdafiə Nazirliyinin mətbuat xidmətinin rəisi polkovnik Vaqif Dərgahlının əks bəyanatına da məqalədə yer verilib: “Suriyadan və Yaxın Şərqdən olan muzdlular Qarabağda ermənilərin tərəfində döyüşürlər. Kəşfiyyatımızın məlumatına görə, düşmən Suriyadan və digər Yaxın Şərq ölkələrindən olan çoxlu sayda muzdlu itirib, lakin onlar Ermənistanda qeydiyyatda deyillər”.
Yazıda məsələyə Anadolu Agentliyinin münasibəti də öz əksini tapıb və Türkiyənin rəsmi informasiya agentliyinin Türkiyənin Azərbaycan suriyalı muzdlular göndərməsi barədə məlumatları təksiz etdiyi vurğulanıb.
Yapon professor Avropa Komissiyasının mətbuat katibinin də həmin məlumatların təsdiq olunmadığı barədə açıqlamasını öz məqaləsinə əlavə edib. Sentyabrın 29-da Avropa Şurasının icraçı orqanı olan Avropa Komissiyasının rəsmi nümayəndəsi Piter Sanonun bildirdiyinə görə, Türkiyənin Azərbaycana suriyalı muzdluları göndərməsi barədə xəbərlər öz təsdiqini tapmayıb.
Bununla yanaşı, professor H.Aoyama Avropa Şurasının digər dövlətlərə müraciət edərək Ermənistanla Azərbaycan arasında qarşıdurmaya müdaxilənin vəziyyəti daha da gərginləşdirə biləcəyi barədə çağırış etdiyini də öz məqaləsində vurğulayıb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
