Yaponiyada təşkil edilən videokonfransda koronavirusa qarşı mübarizədə Azərbaycanın uğurlu təcrübəsindən danışılıb
Tokio, 25 iyun, AZƏRTAC
Yaponiyada tanınmış iş adamı Kazuyasu İşidanın rəhbərlik etdiyi “Sərhədləri aşanlar 3.0” klubu tərəfindən təşkil edilən videokonfransda koronavirusa qarşı mübarizə ilə əlaqədar Azərbaycanda görülən müsbət işlərdən də danışılıb.
AZƏRTAC xəbər verir ki, “Koronavirusa qarşı birlikdə mübarizə aparaq” adlı onlayn tədbirdə Azərbaycan, Birləşmiş Ərəb Əmirlikləri, İslandiya, Monqolustan, Sudan və Koreya Respublikasından 23 nəfər iştirak edib.
Konfrans iştirakçıları COVID-19 pandemiyası ilə əlaqədar dünyanın qarşılaşdığı problemlər və onların həlli yolları, yeni şəraitdə xalqlar arasında əməkdaşlığın inkişafının davam etdirilməsi yolları barədə fikir mübadiləsi aparıblar.
Tədbirin təşkilatçısı, klubun baş meneceri Kazuyasu İşida bildirib ki, koronavirus pandemiyası bütün dünyada ciddi problemlər yaradıb, iqtisadi tənəzzül və psixoloji gərginliyə səbəb olub. Qeyd edib ki, beynəlxalq ictimaiyyətin qarşılaşdığı təhsil, ekologiya, hərbi, ərzaq, enerji və digər problemlər yalnız insanların sıx birliyi nəticəsində aradan qaldırıla bilər. Buna görə də konfrans iştirakçıları müxtəlif ölkələrdə yaranmış vəziyyət barədə fikir mübadiləsi apararaq, problemlərin həlli məqsədilə təkliflərini irəli sürəcək, yeni şəraitdə əməkdaşlığın inkişaf etdirilməsi ilə bağlı lazımi tədbirləri müəyyənləşdirməyə çalışacaqlar.
Videokonfransda çıxış edən Azərbaycan Dillər Universitetinin müəllimi, “Yaponiya araşdırmaları” mərkəzinin rəhbəri Yaşar İbrahimov ölkəmizdə koronavirusun yayılması ilə bağlı mövcud vəziyyət və onun qarşısının alınması istiqamətində həyata keçirilən tədbirlər barədə məlumat verib. Bildirib ki, Azərbaycan rəhbərliyinin bu istiqamətdə həyata keçirdiyi siyasətin əsasında insan sağlamlığının mühafizəsi və yaranan sosial problemlərin həlli dayanır. Bu məqsədlə yeni mobil xəstəxanaların inşası, lazımi tibbi avadanlığın və dərmanların ölkəyə gətirilməsi üçün ardıcıl iş aparılır. Düşünülmüş şəkildə həyata keçirilən karantin tədbirləri, sosial məsafənin gözlənməsi və əhalinin tibbi maskalarla təminatının yüksəldilməsi COVID-19 pandemiyasının ölkədə daha geniş yayılmasının qarşısının alınmasına və insanların sağlamlığının mühafizəsinə yönəlib. Eyni zamanda, orta məktəblər və universitetlər tərəfindən təşkil edilən onlayn dərslər uşaqların və gənclərin təhsilini davam etdirməyə kömək edir.
Azərbaycan rəhbərliyinin koronavirus pandemiyası ilə bağlı gördüyü tədbirlərin beynəlxalq təşkilatlar, o cümlədən Ümumdünya Səhiyyə Təşkilatı tərəfindən yüksək qiymətləndirildiyini qeyd edən Y.İbrahimov ölkəmizin bu işdə beynəlxalq təşəbbüslərin müəllifi kimi çıxış etdiyini də bildirib.
Onlayn konfransın işini yüksək qiymətləndirən iştirakçılar bu tədbirin ayda bir dəfə təşkili və bu işə yeni üzvlərin, müxtəlif xalqların nümayəndələrinin cəlb olunması barədə qərar qəbul ediblər. İrəli sürülən təkliflərin təşkilatçılar tərəfindən ümumiləşdirilməsi və onların həyata keçirilməsi üçün müvafiq qurumlar, o cümlədən beynəlxalq təşkilatlar qarşısında məsələ qaldırılması da qərarda öz əksini tapıb.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
