Yaponiyaya güclü qasırğa yaxınlaşır: 500-dən çox aviareys ləğv olunub
Bakı, 1 avqust, AZƏRTAC
Yaponiyanın cənub regionlarına “Kanun” qasırğası yaxınlaşır. Bu səbəbdən artıq 500-dən çox aviareys ləğv edilib.
AZƏRTAC yapon mediasına istinadla xəbər verir ki, qasırğanın keçdiyi ərazilərdə küləyin sürəti saniyədə 65 metrə çatır.
Bu arada soyuq atmosfer cəbhəsinin Yaponiyaya çatması səbəbindən Tokio leysan yağışları və qasırğanın təsirinə məruz qalıb. Günorta saatlarında paytaxtda havanın hərarəti 33 dərəcədən 28 dərəcəyə enib. Ölkənin meteorologiya agentliyinin məlumatına görə, sutka ərzində paytaxt regionuna 60-100 millimetr yağıntı düşə bilər. Eyni zamanda, çaylarda və göllərdə suyun səviyyəsinin kəskin artması istisna edilmir.
“Tokyo Electric Power” energetika kompaniyası Tokioda və qonşu İbaraki və Tiba prefekturalarında 10 mindən çox binanın elektrik enerjisinin kəsildiyini bildirib.
Təbii fəlakət “Haneda” aeroportunun işində də çətinliklər yaradıb. Baqaj yüklənmə prosesində baş verən problemlərlə ilə bağlı aviareyslər gecikmələrlə həyata keçirilir.
Bölmənin digər xəbərləri
