YASAMAL RAYONUNDA MARTIN 31-İ AZƏRBAYCANLILARIN SOYQIRIMI GÜNÜ İLƏ ƏLAQƏDAR ANMA MƏRASİMİ KEÇİRİLMİŞDİR
Bakı, 31 mart (AZƏRTAC). 31 mart - Azərbaycanlıların soyqırımı günü ilə əlaqədar Yasamal rayonunda faciə qurbanlarının xatirəsinə ucaldılmış abidənin önündə anma mərasimi keçirilmişdir. Mərasimdə Yasamal Rayon İcra Hakimiyyətinin başçısı İbrahim Mehdiyev, Yeni Azərbaycan Partiyası rayon təşkilatının sədri Fikrət İsmayılov, Bakı Metropoliteninin rəisi Tağı Əhmədov, ali məktəblərin rektorları, ictimaiyyətin nümayəndələri abidənin önünə əklil və gül-çiçək dəstələri qoymuşlar.
Sonra mərasim iştirakçıları ermənilərin azərbaycanlılara qarşı törətdikləri soyqırımı qurbanlarının xatirəsini bir dəqiqəlik sükutla yad etmişlər.
Tədbirdə çıxış edənlər 1918-ci ilin mart-aprel hadisələri haqqında ətraflı məlumat vermiş, erməni qəddarlığının xalqımızın yaddaşından heç vaxt silinməyəcəyini söyləmişlər. Xüsusi vurğulanmışdır ki, yalnız Azərbaycan xalqının ümummilli lideri Heydər Əliyevin yenidən siyasi rəhbərliyə qayıdışından sonra və onun müvafiq Fərmanına əsasən 1998-ci ildən etibarən martın 31-i Azərbaycanlıların soyqırımı günü kimi qeyd edilir.
Azərbaycana qarşı həmişə torpaq iddiası ilə çıxış etmiş ermənilər saysız-hesabsız qətllər törətmiş, minlərlə günahsız soydaşımızı öldürmüşlər. Erməni silahlı dəstələri 1918-ci ildə Bakı qəzasında 229, Gəncə qəzasında 272, Zəngəzur mahalında 115, Qarabağda isə 157 kəndi yerlə-yeksan etmişlər.
######
 |
 |
Bölmənin digər xəbərləri
