Bakı, 6 noyabr, AZƏRTAC

Gənclər Fondunun maliyyə dəstəyi ilə Biləsuvar Yeniyetmə və Gəncləri İctimai Birliyi tərəfindən reallaşdırılan “Yaşıl dünya naminə” layihəsi çərçivəsində Biləsuvar rayonunda “Yaşıl dünya naminə həmrəylik ili” və COP29-a həsr edilən təmizlik və ağacəkmə aksiyası keçirilib. Aksiya Azərbaycanın Milli Qəhrəmanı Mübariz İbrahimov adına Biləsuvar Təhsil Kompleksinin təşkilatçılığı və rayon icra hakimiyyətinin dəstəyi ilə baş tutub.

AZƏRTAC xəbər verir ki, layihə rəhbəri Ülvi Həzizadə dövlət gənclər siyasəti, Gənclər Fondunun regionda reallaşdırdığı tədbirlər, həmçinin layihənin əhəmiyyəti barədə geniş məlumat verib.

Milli Qəhrəman Mübariz İbrahimov adına Biləsuvar Təhsil Kompleksinin icraçı direktoru Aqşin Bağırov bildirib ki, bu gün dünyanı narahat edən qlobal problemlərdən biri də iqlim dəyişikliyidir. Ölkəmizin də qlobal iqlim dəyişikliyinin təsirindən kənarda qalmadığını söyləyən icraçı direktor bu problemə qarşı mübarizədə diqqətin artması, beynəlxalq həmrəyliyin gücləndirilməsi məqsədilə Prezident İlham Əliyevin 2024-cü ilin Azərbaycanda “Yaşıl dünya naminə həmrəylik ili” elan edilməsi haqqında Sərəncam imzaladığını vurğulayıb. O bildirib ki, bu Sərəncam Azərbaycanın qlobal təşəbbüslərə ilk qoşulan ölkələr sırasında olduğunu bir daha sübut edir.

Biləsuvar rayonu üzrə gənclər və idman sektorunun müdiri Azad Quliyev layihənin aktual olduğunu xüsusilə qeyd edib. O, dünyanı narahat edən ekoloji problemlər, iqlim dəyişiklikləri və onların canlı aləmə mənfi təsirlərindən, ekoloji mədəniyyətdən söhbət açıb.

Tədbirdə, həmçinin Biləsuvar Gənclər Evinin direktoru Vəkil Cəfərli, Gənclərin İnkişafı və Karyera Mərkəzinin Şirvan-Salyan regional nümayəndəliyinin koordinatoru İsmayıl Ağacanlı çıxış ediblər. Çıxışlarda gənclərin maarifləndirilməsinin vacibliyi qeyd olunub.

Sonra məktəblilərə təmizlik aksiyası üçün tibbi əlcək, maska və zibil torbaları paylanıb və müəyyənləşdirilmiş ərazi tullantılardan təmizlənib. Toplanmış zibillər rayon təmizlik idarəsinə təhvil verilib. Daha sonra qonaqların iştirakı ilə məktəblilər tərəfindən 50 ədəd həmişəyaşıl şam ağacı əkilib.

Sonda iştirakçılara fəallıq göstərdiklərinə görə sertifikatlar təqdim olunub.

Qeyd edək ki, layihənin məqsədi regionlarda yaşayan gənclərin yaşıl dünya naminə maarifləndirilməsi və bu prosesdə fəal iştiraka dəvət edilməsi, ekoloji çirklənmənin qarşısının alınması və yaşıllıqların artırılmasıdır. Layihənin növbəti mərhələsinin Salyan rayonunda keçirilməsi nəzərdə tutulur.