“YAŞIL YAŞA” ADLI VELOSİPED TURU KEÇİRİLMİŞDİR
Ağcabədi, 22 may (AZƏRTAC). Aqro İnformasiya Mərkəzi (AİM) 22 may - Beynəlxalq Biomüxtəliflik Günü münasibətilə “Yaşıl yaşa” adlı velosiped turu keçirmişdir.
Turun keçirilməsində məqsəd əhalinin diqqətini ətraf mühitin mühafizəsinə cəlb etmək və ekoloji nəqliyyat vasitəsi olan velosipedi təbliğ etməkdir.
Turda təşkilatın heyət üzvləri, Amerika Sülh Korpusunun Könüllüləri və digər təşkilatların nümayəndələri, eləcə də regionda yaşayan gənclər iştirak etmişlər.
Tur Ağcabədi Rayon İcra Hakimiyyətinin binası qarşısında ümummilli lider Heydər Əliyevin abidəsi qarşısına gül dəstələri qoyulması ilə başlanmışdır.
Rayon icra hakimiyyəti başçısının müavini Leyla Əsgərova və AİM-nin Ağcabədi rayon şöbəsinin rəhbəri Fazil Cəfərov çıxış edərək, ölkədə ekoloji durumun yaxşılaşdırılması istiqamətində görülən işlərdən və velosiped turunun əhəmiyyətindən danışmış, iştirakçılara uğurlar arzulamışlar.
Velosipedçilər yol polisinin müşayiəti ilə Ağdam rayonu ərazisindən keçməklə, Bərdə istiqamətində 45 kilometr məsafədə hərəkət etmişlər. Tur zamanı velosipedçilər keçdikləri yaşayış məntəqələrində dayanaraq yerli əhali arasında ekoloji maarifləndirmə işləri aparmış, onlara bu məqsədlə hazırlanmış jurnal və bukletlər paylamışlar.
Tur Bərdə rayonu ərazisində - Sultanbud meşəsində tamamlanmışdır. Burada Amerika Sülh Korpusu Könüllülərinin “Aqrar və sosial meşəçilik”, “Ekoloji təmiz kənd təsərrüfatı” mövzularında təqdimatları olmuşdur.
Bölmənin digər xəbərləri
