YENİ AZƏRBAYCAN PARTİYASI BAKIDA İZDİHAMLI MİTİNQ-YÜRÜŞ KEÇİRMİŞDİR
AZƏRTAC xəbər verir ki, Yeni Azərbaycan Partiyası noyabrın 4-də Bakıda icazəli yürüş-mitinq keçirmişdir. Metronun “20 Yanvar” stansiyasından keçmiş “Qələbə” kinoteatrının qarşısındakı meydana qədər böyük bir məsafədə yüz minlərlə insan toplaşmışdı. Onlar - Vətənə, müstəqil Azərbaycan dövlətinin memarı və qurucusu ümummilli lider Heydər Əliyevin xatirəsinə tükənməz məhəbbətlərini ifadə edən insanlar mitinq-yürüşə “YAP xalqın gələcəyinə inamıdır!”, “Azad, demokratik və şəffaf seçkilər xalqımızın iradəsini əks etdirəcək”, “Xalq İlham Əliyevi dəstəkləyir!”, “Demokratik cəmiyyət uğrunda!” və digər şüarlar yazılmış transparantlarla çıxmışdılar. Lakin diqqəti ən çox cəlb edən Azərbaycan Respublikasının 1000 metr uzunluğunda üçrəngli dövlət bayrağı idi.
Çıxış edənlər əminliklə bildirdilər ki, qarşıdan gələn parlament seçkiləri Azərbaycan xalqının yüksək seçki mədəniyyətini, siyasi iradəsini bütün dünyaya nümayiş etdirəcəkdir. Seçkilərin demokratik, azad, ədalətli və şəffaf keçirilməsi üçün bütün tədbirlər görülmüş, Azərbaycan Prezidentinin 11 may və 25 oktyabr tarixli Sərəncamları bu sahədə mühüm addımlar olmuşdur.
Tam sakit şəraitdə keçən mitinq-yürüş konsert proqramı və atəşfəşanlıqla başa çatmışdır.
Bölmənin digər xəbərləri
