SİYASƏT
Yeni Azərbaycan Partiyası xalqın iradəsini ifadə edən siyasi təşkilata çevrilmişdir
![Yeni Azərbaycan Partiyası xalqın iradəsini ifadə edən siyasi təşkilata çevrilmişdir](/files/2013/3/1200x630/14071451423482110363_1200x630.jpg)
Bakı, 20 noyabr (AZƏRTAC). Azərbaycan Respublikası dövlət Neft Şirkətinin “Ekol Mühəndislik Xidmətləri” QSC-də Yeni Azərbaycan Partiyasının (YAP) 21 illiyi ilə əlaqədar tədbir keçirilmişdir.
AZƏRTAC xəbər verir ki, tədbirdə YAP Nizami rayon təşkilatının sədri, Milli Məclisin deputatı Sədaqət Vəliyeva, təşkilatın aparat rəhbəri Ramil Vəlibəyov, QSC-nin rəhbərliyi və YAP “Ekol” ilk ərazi təşkilatının fəalları iştirak etmişlər.
Qeyd olunmuşdur ki, YAP siyasi səhnəyə XX əsrin 90-cı illərinin əvvəllərində, ölkədə yaranmış mürəkkəb ictimai-siyasi şəraitdə gəlmişdir. Partiyanın təsis konfransı 1992-ci il noyabrın 21-də Naxçıvanda keçirilmiş və Heydər Əliyev yekdilliklə partiyanın sədri seçilmişdir. Müxalifət partiyası kimi meydana gələn YAP qısa müddətdə geniş şöhrət qazanaraq cəmiyyətin sağlam qüvvələrini öz ətrafında birləşdirmiş və ümumxalq partiyasına çevrilmişdir. 1993-cü ildə YAP-ın sədri Heydər Əliyevin Prezidenti seçilməsi ilə partiyanın həyatında yeni dövrün əsası qoyulmuş, partiyanın statusu yeni şəraitə uyğun olaraq dəyişmiş, iqtidar partiyasına çevrilərək ölkənin siyasi həyatında tutduğu mövqeyini möhkəmləndirmişdir.
Milli Məclisin deputatı Sədaqət Vəliyeva bildirmişdir ki, ölkəmizin ictimai-siyasi həyatında fəal rol oynayan YAP-ın qərarları Azərbaycanın inkişafına böyük tövhələr vermişdir. Cənubi Qafqazın ən böyük siyasi partiyası olan və ötən 21 ildə ölkədə keçirilən bütün seçkilərdə böyük üstünlüklə qələbə qazanan YAP xalqın iradəsini ifadə edən siyasi təşkilata çevrilmişdir. Əsas ideoloji dayaqları müstəqillik, azərbaycançılıq, sosial inkişaf, siyasi və iqtisadi islahatlar olan YAP ölkəmizin sürətli inkişafına nail olunmuş, Azərbaycanın xarici siyasətində bir çox uğurlara imza atılmışdır.
Bu gün YAP Azərbaycanın qlobal problemlərinin həllində mühüm rol oynayır. Ölkəmiz Avropanın enerji təhlükəsizliyinin həllində mühüm faktordur. Xarici siyasətdə qazanılan uğurlar, daxildə də uğurlu siyasətin aparılmasına, iqtisadi sahədə ölkənin parlaq gələcəyinin planlaşdırılmasına imkan vermişdir.
Bildirilmişdir ki, bütün nailiyyətlərimizin təməlində Heydər Əliyev siyasəti dayanır, dövlətimizin yürütdüyü siyasətin mərkəzində duran əsas qüvvə isə Azərbaycan vətəndaşıdır. Dövlətimizin siyasi sisteminin sütunu olan YAP ölkəmizdə siyasi islahatların aparılmasında da mühüm rol oynayır. Buna görə də YAP-ın siyasi səhnədə ciddi rəqibi yoxdur.
Sonra YAP Nizami rayon təşkilatının fəal üzvlərinə fəxri fərmanlar və mükafatlar təqdim edilmişdir.