Yeni dövrün çağırışlarına layiqli cavab
Bakı, 12 yanvar, AZƏRTAC
Ölkəmizin hər bir sakini üçün yeni bir mərhələ başlayır. Torpaqlarımız işğaldan azad edildikdən sonra Azərbaycan vətəndaşının yeni bir obrazı yaranıb. İndi artıq Azərbaycan həm beynəlxalq münasibətlər, həm iqtisadi əməkdaşlıq sistemində yeni obrazla və yeni müstəvidə iştirak edir. Təbii ki, bu, ölkəmizin qarşısına həm də yeni hədəflər qoyur. Azərbaycan məhz bu yeni dövrün çağırışlarına cavab verməlidir. Həmin şərtlər daxilində əsas diqqət və resurslar növbəti mərhələdə yeni dövrün tələblərinə uyğun inkişaf prioritetlərinin həyata keçirilməsinə yönəldilməlidir.
AZƏRTAC xəbər verir ki, Milli Məclisin deputatı, siyasi elmlər doktoru Elşad Mirbəşiroğlu bu sözləri Prezident İlham Əliyevin yerli televiziya kanallarına verdiyi müsahibəni şərh edərkən deyib.
Həmsöhbətimiz qeyd edib ki, dövlət başçısının müsahibəsi həm ölkə miqyasında, həm də beynəlxalq müstəvidə çox böyük maraq doğurub. Prezidentin qeyd etdiyi kimi, indi Azərbaycan dünyanın ən güclü dövlətləri sırasında yer tutur. Respublikamız olduqca strateji əhəmiyyətli regionda yerləşir. Ona görə də Cənubi Qafqaz regionunun ən güclü dövlətinin başçısının fikirləri çox mühüm əhəmiyyət kəsb edir.
Deputat deyib: “Yerli televiziya kanallarına müsahibə zamanı növbədənkənar prezident seçkilərinin yeni reallıqlar şəraitindəki əhəmiyyəti, onu zəruri edən səbəblər barədə çox tutarlı arqumentlər göstərildi. Dövlət başçısı haqlı olaraq qeyd etdi ki, torpaqlarımızın bütövlüyünün təmin edildiyi şəraitdə ilk seçkilər prezident seçkiləri olmalıdır. Nəzərə almaq lazımdır ki, ölkəmizin müstəqillik tarixi ərzində indiyədək heç bir seçki tam süverenliyin bərpa olunduğu şəraitdə keçirilməyib və bütövlüyün təmin olunduğu şəraitdə ilk seçkilərin prezident seçkiləri olması tam qanunauyğun və ədalətli bir işdir. Məhz fevralın 7-də ilk dəfə olaraq bütün ölkə seçiciləri yeni reallıqlar şəraitində dövlət başçısı seçmək hüququndan istifadə edəcəklər. Təbii ki, bu, hər bir seçicinin həyatında tarixi hadisə kimi yadda qalacaq.
Prezident İlham Əliyev tərəfindən müəyyənləşdirilən “Azərbaycan 2030: Sosial-iqtisadi inkişafın Milli Prioritetləri” qəbul edilib və beş istiqamətdə ölkəmizin gələcək inkişafını və perspektivini müəyyən edən kompleks işlər həyata keçirilməsi nəzərdə tutulur. Onlardan ən vacibi isə işğaldan azad olunmuş ərazilərin məskunlaşdırılması və həmin ərazilərin iqtisadi resurslarının ümummilli inkişaf dövriyyəsinə inteqrasiya edilməsidir. Milli Prioritetlərin həyata keçirilməsi çərçivəsində həm də 2022-2026-cı illərdə sosial-iqtisadi inkişaf strategiyası müəyyən edilib və həmin strategiya çərçivəsində işğaldan azad edilən ərazilərdə bərpa və quruculuq işlərinin aparılması ən əsas vəzifələrdən biridir. Həmin strategiyanın həyata keçirilməsində də ən məsuliyyətli dövr 2025-2026-cı illər olacaq. Prezidentin qeyd etdiyi kimi, 140 mindən artıq soydaşımız 2026-cı ilə qədər öz doğma yurd-yuvasına köçürüləcək”.
Dövlət başçısı yerli televiziya kanallarına verdiyi müsahibədə 2024-cü ildə beş şəhərdə - Şuşa, Xankəndi, Xocalı, Kəlbəcər və Cəbrayılda keçmiş məcburi köçkünlərin məskunlaşdırılmasına başlanılacaq, həmin ərazilərdə infrastruktur quruculuğu və tikinti-bərpa işlərinin sürəti artırılacaq. Ötən ilin sentyabrında lokal antiterror tədbirlərindən sonra ölkəmizin həyatında yeni bir tarixi mərhələ başlanılıb və bu yanaşma cəmiyyət, eləcə də beynəlxalq ictimaiyyət üçün olduqca maraq doğuran məsələdir. Bu, Azərbaycan tarixinin yeni mərhələsi kimi səciyyələndirilə bilər. Təbii ki, yeni dövrdə ölkəmizin yeni inkişaf hədəfləri mövcuddur və şübhəsiz ki, bundan sonra ölkəmizin beynəlxalq müstəvidə yeri və rolu daha da güclənəcək. Bunlar ölkəmizin milli maraqlarına uyğun və daha səmərəli fəaliyyət göstərməsini şərtləndirəcək. İşğaldan azad edilən bölgələrin böyük iqtisadi resursları onun daha dinamik inkişafına, sosial-iqtisadi vəziyyətin daha da yaxşılaşmasına səbəb olacaq.
Müsahibədə bu il ölkəmizdə keçiriləcək COP29 platforması barədə də ətraflı məlumat verilib. İşğaldan azad edilən zonalarda bərpa olunan enerji mənbələrinin yaradılması planlarının çox geniş olduğunu qeyd edən siyasi elmlər doktoru deyib: “Bu sahədə müxtəlif ölkələrlə əməkdaşlıq çərçivəsində artıq müəyyən uğurlu addımlar atılıb. Azərbaycanın energetika sahəsində imkanlarının genişlənməsinə səbəb olacaq və ölkə iqtisadiyyatının inkişafı üçün yeni təkan verəcək. COP29-un Azərbaycanda keçirilməsi təşəbbüsü beynəlxalq qüvvələr tərəfindən dəstəkləndi. Ölkəmiz ətraf mühitin qorunması, iqlim dəyişmələrinə qarşı mübarizə istiqamətində hər zaman öz fəallığı ilə seçilib və öz üzərinə kifayət qədər ciddi öhdəliklər götürüb. Belə ki, istixana qazlarının atmosferə buraxılmasının 2050-ci ilə qədər 40 faizə qədər azaldılması öhdəliyi kifayət qədər ciddidir. Bu, həm də onun göstəricisidir ki, Azərbaycan iqlim dəyişmələri və ətraf mühitin qorunmasına qarşı ciddi töhfələr verən ölkələr sırasındadır”.
E. Mirbəşiroğlu Prezident İlham Əliyevin jurnalistlərlə müsahibəsi zamanı bir sıra mühüm məsələlərə aydınlıq gətirdiyini və çox təsirli mesajlar da verdiyini qeyd edib.
Bölmənin digər xəbərləri
