YEVLAX-BALAKƏN İSTİQAMƏTİNDƏ QATARLARIN HƏRƏKƏTİ BƏRPA OLUNMUŞDUR
Bakı, 31 may (AZƏRTAC). “Azərbaycan Dəmir Yolları” Qapalı Səhmdar Cəmiyyəti mətbuat xidmətinin rəhbəri Nadir Əzməmmədovun verdiyi məlumata görə, respublikanın şimal-qərb bölgəsinə yağan leysanın Yevlax-Balakən qatarının hərəkətində yaratdığı problemlər aradan qaldırılmışdır.
Xəbər verildiyi kimi, Qax rayonu ərazisinə yağan güclü leysan yağışından sonra Qapıçay çayının məcrasından çıxması nəticəsində dəmir yolu xəttinin 122-ci kilometrini su basdığına görə, mayın 30-da səhər saat 9.00-dan axşamadək Yevlax-Balakən marşrutu istiqamətində qatarın hərəkəti təhlükəsizlik baxımından təxirə salınmışdır.
Yevlax-Balakən istiqamətində qatarların hərəkətinin bərpası üçün Şəki yol istismar idarəsinin əlliyə yaxın işçisi, eləcə də kran və teplovoz əraziyə gətirilmişdir. Görülən tədbirlər nəticəsində Yevlax-Balakən istiqamətində qatarın hərəkəti bərpa olunmuşdur. Bundan əlavə, mayın 30-da sel sularına məruz qalan Xaldan-Balakən magistral yolu da açılmış, avtomobillərin hərəkətindəki məhdudiyyətlər aradan qaldırılmışdır.
Bölmənin digər xəbərləri
