ZABİT VƏ GİZİRLƏR ÜÇÜN YENİ YATAQXANABİNASI İSTİFADƏYƏ VERİLMİŞDİR
Daxili Qoşunlar Komandanının müavini - şəxsi heyətlə iş üzrə idarənin rəisi, general-mayor Vidadi Əliyev Silahlı Qüvvələrin Ali Baş Komandanı İlham Əliyevin Daxili Qoşunlara göstərdiyi diqqət və qayğı nəticəsində son dövrdə qoşunların hərbi hissələrində quruculuq işlərinin geniş vüsət aldığını, şəxsi heyət üçün müasir standartlara cavab verən xidmət və məişət şəraitinin yaradıldığını xüsusi vurğulamışdır. O, hərbi hissələrdə inşa olunan yeni əsgər yataqxanalarının və digər obyektlərin istismara verilməsinin ənənəyə çevrildiyini söyləmiş, bina barədə məlumat vermiş, obyektin tikintisində çalışanlara minnətdarlığını bildirmişdir.
DİN-in tikinti-quraşdırma idarəsinin inşa etdiyi, müasir standartlara uyğun şərait yaradılmış bina 55 ailə və120-dən çox subay üçün nəzərdə tutulmuş bir və iki otaqdan ibarətdir. 5 mərtəbəli binanın birinci mərtəbəsi hərbi hissələrdən ezamiyyətə gəlmiş hərbi qulluqçuların müvəqqəti yaşaması üçündür.
Zabit və gizirlər yeni mənzillə təmin olunmalarını Silahlı Qüvvələrin Ali Baş Komandanı, Prezident İlham Əliyevin hərbi qulluqçuların sosial rifahının yaxşılaşdırılmasına göstərdiyi diqqət və qayğısının təzahürü kimi qiymətləndirmişlər.
Daxili işlər naziri, general-polkovnik Ramil Usubov dövlətimizin başçısı İlham Əliyevin təbrik və xoş arzularını çatdıraraq demişdir ki, Azərbaycanda bütün sahələrdə, o cümlədən ordu quruculuğunda qazanılan nailiyyətlərin təməli məhz böyük öndər, ümummilli liderimiz Heydər Əliyev tərəfindən qoyulmuşdur. Bu gün ölkəmiz Prezident İlham Əliyevin rəhbərliyi altında dinamik inkişaf edir. Məhz bu inkişafın nəticəsidir ki, hərbi qulluqçularımızın sosial-məişət şəraiti ildən-ilə daha da yaxşılaşır, hərbi hissələrdə müasir standartlara uyğun yeni binalar inşa olunur.
General-polkovnik Ramil Usubov mənzillərin açarlarını sahiblərinə təqdim edərək, daxili qoşunların hərtərəfli inkişafı istiqamətində görülən tədbirlərdən ətraflı söz açmış, şəxsi heyəti, zabit və gizirləri təbrik etmiş, onlara şərəfli xidmətlərində uğurlar arzulamışdır.
Yataqxana binasının rəmzi açılışını bildirən lent kəsildikdən sonra iştirakçılar binanın otaqları ilə tanış olmuş, görülən işləri müsbət dəyərləndirmişlər.
Daxili işlər naziri, general-polkovnik Ramil Usubov hərbi hissənin qərargahında keçirdiyi brifinqdə jurnalistləri maraqlandıran suallara ətraflı cavab vermişdir.
