Tbilisi, 16 mart, AZƏRTAC

Azərbaycan Cənubi Qafqazda Gürcüstanın ən yaxın dostu və strateji tərəfdaşıdır. Biz təkcə qanunvericilik orqanları arasında deyil, bütün sahələrdə əlaqələrimizi inkişaf etdirir və daha da möhkəmləndiririk.

Bu fikirləri AZƏRTAC-a müsahibəsində Gürcüstan-Azərbaycan parlamentlərarası dostluq qrupunun sədri Zurab Tkemaladze söyləyib. O bildirib ki, dost və qardaş ölkələrimiz arasında əlaqələrin hərtərəfli inkişafı üçün möhkəm hüquqi baza var: “Bizim çox mükəmməl qanunvericilik bazamız var. Bu, bizə münasibətlərimizi bütün sahələrdə inkişaf etdirməyə imkan verir. Dostluq qrupları parlamentlərarası əlaqələrin inkişafında mühüm rol oynayırlar. Azərbaycan Milli Məclisinə keçirilmiş seçkilərdən sonra dostluq qrupu yenidən formalaşıb. Yaxın vaxtlarda qarşılıqlı səfərlərimiz yenidən başlayacaq. Deputatlarımız beynəlxalq təşkilatlarda da bəzi məsələlərdə vahid mövqedən çıxış edirlər. Bu da bizim yaxın dostluğumuzun göstəricisidir”.

Parlamentdə həm də iqtisadiyyat komissiyasının sədri olan Zurab Tkemaladze deyib: “Cənubi Qafqazda Azərbaycanın və Gürcüstanın birgə əməkdaşlığı sahəsində həyata keçirilən irimiqyaslı layihələr bizim beynəlxalq nüfuzumuzun artmasında, eləcə də regionda mövqelərimizin möhkəmlənməsində mühüm rol oynayır. Biz Azərbaycanın Gürcüstana göstərdiyi köməyi unuda bilmərik. Məhz Azərbaycanın yaxın köməyi nəticəsində Gürcüstanın təbii qaza olan ehtiyacı demək olar ki, tam ödənilib. Bu, həmçinin bizim müstəqilliyimizin möhkəmlənməsi deməkdir. Biz bunu yüksək qiymətləndiririk. Bunu unutmaq olmaz”.

Xətayi Əzizov

AZƏRTAC-ın xüsusi müxbiri

Tbilisi