Azərbaycanın Qazaxıstandakı səfirliyində Novruz bayramı qeyd edilib VİDEO
Astana, 17 mart, АZƏRTAC
Qazaxıstanın paytaxtı Astanada Azərbaycan səfirliyinin təşkilatçılığı ilə Novruz bayramı qeyd edilib.
AZƏRTAC xəbər verir ki, tədbir çərçivəsində Azərbaycanın istehsal etdiyi məhsullar, ölkəmiz haqqında müxtəlif nəşrlər nümayiş olunub. Qonaqların diqqətini qədim Azərbaycan xalçalarından ibarət sərgi və kompozisiya cəlb edib. Xalçaların üzərində mis qablar, milli musiqi alətləri və digər eksponatlar tədbir iştirakçılarında Azərbaycanın zəngin mədəniyyətinə marağını daha da artırıb.
Azərbaycanın Qazaxıstandakı səfiri Rəşad Məmmədov qonaqları və həmvətənlərimizi Novruz bayramı münasibətilə təbrik edərək bildirib ki, hər il ölkəmizdə Novruz şənliyi təntənəli şəkildə qeyd edilir. Səfir xüsusi olaraq vurğulayıb ki, sovet dövrünün amansız təqibləri nəticəsində bir çox azərbaycanlılar öz doğma torpaqlarından didərgin düşərək Qazaxıstana pənah gətiriblər. Qazax xalqı da onlara böyük qayğı göstərib, isti qucaq açıb, onların cəmiyyətə inteqrasiyası üçün münbit şərait yaradıb. Qazaxıstanda da Novruz bayramı xalqın ən qədim bayramlarından hesab edilir.
Diplomat Azərbaycan diasporuna dövlət qayğısından danışaraq vurğulayıb ki, məhz səfirliyin təşəbbüsü və təşkilatçılığı ilə Novruz şənliyinin təntənəli şəkildə keçirilməsi dövlətimizin Qazaxıstanda yaşayan həmyerlilərimizə qayğısının bir təzahürüdür.
Tədbirdə Azərbaycan Prezidentinin müvafiq Sərəncamı ilə Dünya Azərbaycanlılarının Həmrəylik Günü münasibətilə, xalqlar arasında dostluğun möhkəmləndirilməsi və Azərbaycan diasporunun inkişafı sahəsindəki xidmətlərinə görə “Tərəqqi” medalına layiq görülən Qazaxıstanın Atırau şəhərindəki “Novruz” Milli-Mədəni Cəmiyyətinin sədri Eldar Əhmədova mükafat təqdim edilib.
Sonra Astanada fəaliyyət göstərən ən fəal icma üzvləri səfirliyin diplomları ilə təltif olunublar.
Tədbirdə Beynəlxalq Türk Mədəniyyəti və İrsi Fondunun prezidenti Günay Əfəndiyevanın qazax xalqına təbriki səsləndirilib. Təbrikdə deyilir: “Novruz bayramı xalqları yaxınlaşdıran körpüdür, bir ənənəyə çevrilən qarşılıqlı sevgi və hörmətdir. Novruz - türkdilli xalqları birləşdirən alovlanan ocaqdır. Arzu edirəm ki, bu alov sizin evlərinizdə heç vaxt sönməsin və hər ocaqda sevinc, hərarət qorunsun. Novruz bayramı münasibətilə bütün türk dünyasını təbrik edirəm. Ümidvaram ki, bizim birgə səylərimiz xalqlarımızın mənafelərinə uyğun olaraq dostluq və əməkdaşlığı, yüksək dəyərləri və bu bayram ənənələrini qoruyub saxlayacaq, bundan sonra da inkişaf edərək möhkəmlənəcək.”
Bayram mərasimində Novruz adət-ənənələrindən olan yumurta döyüşü nümayiş olunub. Qonaqlara məlumat verilib ki, bu gün Novruzun xalqımız tərəfindən sevilməsi onun adətləri ilə də sıx bağlıdır. Papaq atmaq, qulaq falına çıxmaq, tonqaldan tullanmaq, yumurta döyüşdürmək, yallı getmək və xoruz döyüşdürmək kimi Novruz oyunları min illərin adət-ənənəsidir.
Novruz şənliyində bir-birindən fərqlənən musiqi nömrələri iştirakçılarda bayram əhval-ruhiyyəsi oyadıb.
Tədbirdə milli mətbəximizlə yanaşı, Novruz süfrəsini bəzəyən şəkərbura, paxlava, badambura, şərbət və digər milli şirniyyatlarımız qonaqlara təqdim edilib.
İlahə Əhmədova
AZƏRTAC-ın xüsusi müxbiri
Astana
Bölmənin digər xəbərləri
