Qəbələdə atıcılıq üzrə beynəlxalq Qran-Prinin birinci mərhələsində Azərbaycanın üç idmançısı ilk dörd yerdədir VİDEO
Qəbələ, 9 may, Şahnəzər Bəşirov, AZƏRTAC
Ulu öndər Heydər Əliyevin anadan olmasının 95 illik yubileyi münasibətilə Qəbələ rayonun Bum qəsəbəsindəki Stend və Ox Atıcılığı Kompleksində keçirilən stend atıcılığı üzrə beynəlxalq Qran-Pri yarışları davam edir.
AZƏRTAC-ın bölgə müxbiri xəbər verir ki, mayın 9-da qadınlar və kişilər arasında səngər stendi yarışlarının ilk təsnifat mərhələsi keçirilib. Bu yarışda 8 ölkədən 33 idmançı 125 hədəfdən 75-nə atəş açıb. Dünyanın tanınmış atıcısı olan rusiyalı Olimpiya çempionu Aleksey Alipov 75 hədəfin hamısını uğurla vuraraq turnir cədvəlində birinci olub. Hazırda xal hesabına görə öndə olan altı idmançıdan üçü Rusiya, biri İran, ikisi Azərbaycanı təmsil edir. Tamerlan Məmmədov 71 xalla ikinci, Əli Hüseynli 70 xalla dördüncü sıradadır.
Qadınların yarışında isə Ukrayna atıcısı Alyona Axotska 75 hədəfdən 68-ni vuraraq turnir cədvəlində birinci yerdə qərarlaşıb. Bu yarışda Azərbaycan atıcısı Aydan Camalova və rusiyalı Nataliya Zvaqinseva 67 xalla ikinci sıradadırlar. Mayın 10-da bu yarışların ikinci mərhələsi üzrə daha 50 hədəfə atəş açılacaq və finalçılar müəyyənləşəcək. Həmin gün dairəvi stend atıcılığı üzrə idmançıların məşq prosesi də olacaq.
Qeyd edək ki, “Qəbələ” Atıcılıq Klubunun təşkilatçılığı, Azərbaycan Atıcılıq Federasiyasının, Gənclər və İdman Nazirliyinin dəstəyi ilə keçirilən yarışlarda Azərbaycan, Türkiyə, Gürcüstan, Ukrayna, Özbəkistan, Rusiya, İran, Birləşmiş Ərəb Əmirlikləri və Bəhreyndən 70 idmançı iştirak edir. Azərbaycanı bu mötəbər yarışda 26 idmançı təmsil edir. Səngər stendi yarışlarında 3, dairəvi stend yarışlarında isə 4 gənc idmançımız mübarizə aparır. Qran-Pridə dünyanın tanınmış idmançıları ilə yanaşı, gənc atıcılarımızın da yarışması onların yaxşı təcrübə toplamasına imkan yaradır.
Mayın 12-dək davam edəcək mötəbər yarışda idmançılar 6 dəst medal uğrunda mübarizə aparacaqlar. Atıcılığın səngər və dairəvi stend növləri üzrə keçirilən bu yarışda gənclər, kişilər və qadınlar mükafatlar uğrunda güclərini sınayacaqlar. Yarışın rəsmi açılış mərasimi mayın 10-da keçiriləcək.
Bölmənin digər xəbərləri
