Ermənistan ordusu Goranboyun kəndinə “Smerç” raketi atıb FOTO VİDEO

Goranboy, 5 noyabr, Məhərrəm Əlioğlu, AZƏRTAC

Ermənistan silahlı qüvvələri iriçaplı silahlardan və artilleriya qurğularından ordumuzun mövqelərini və yaşayış məntəqələrimizi atəşə tutmaqda davam edir. Dinc əhalini və mülki infrastrukturu hədəf alan düşmən Azərbaycanın şəhərlərinə, rayonlarına, kəndlərinə mərmilər və qadağan olunmuş bombalar atır.

AZƏRTAC-ın cəbhə bölgəsinə ezam olunmuş xüsusi müxbiri xəbər verir ki, düşmənin Goranboy rayonunun Meşəli kəndinə atdığı "Smerç" raketi yaşayış məntəqəsinə yaxın əraziyə düşüb. Raketdən ayrılan iki ədəd bombacıq partlamayıb.

Bu, Ermənistanın mülki şəxsləri məqsədyönlü şəkildə atəşə tutmasına daha bir sübutdur.

Azərbaycan Respublikası Ərazilərinin Minalardan Təmizlənməsi üzrə Milli Agentliyin (ANAMA) əməkdaşı Bəhruz Namazov deyib ki, ANAMA-nın təcili və təxirəsalınmaz əməliyyat axtarış qrupu əraziyə cəlb olunub və müvafiq tədbirlər görülüb. Hazırda bombacıqların zərərsizləşdirilməsi istiqamətində işlər davam etdirilir.

Əraziyə baxış keçirilən zaman aşkarlanan iki ədəd bombacıq “Smerç” tipli raketdən düşüb. Xoşbəxtlikdən həmin bombacıqlar boş əraziyə düşdüyündən xəsarət alan olmayıb. Bu bombacıqlar qadağan olunmuş silahlardandır.

Hazırda ərazidə yerüstü baxış davam edir. Yeni bombacıqlar aşkarlanarsa, onlar da zərərsizləşdiriləcək.