İlqar Rəhimov: Bütün azarkeşləri Azərbaycan komandasını dəstəkləməyə dəvət edirəm VİDEO
Tokio, 26 avqust, AZƏRTAC
Bütün azarkeşləri Tokio Paralimpiya Oyunlarında Azərbaycan komandasını dəstəkləməyə dəvət edirəm.
Bu sözləri AZƏRTAC-ın Yaponiyadakı xüsusi müxbirinə məxsusi müsahibəsində Azərbaycan Milli Paralimpiya Komitəsinin (AMPK) prezidenti İlqar Rəhimov paralimpiyaçımız Pərvin Məmmədovun ilk medal qazanmasını şərh edərkən bildirib. Tokioda Paralimpiya Oyunlarının artıq start götürdüyünü qeyd edən İlqar Rəhimov beş il davam edən hazırlıqdan sonra Azərbaycan komandasının da böyük heyətlə bu yarışlara qatıldığını deyib: “Yüksək səviyyədə təşkil edilən açılış mərasimində təşkil edilən parada bizim idmançılar yaxalarında Zəfər nişanımız olan Xarı bülbüllə çıxdılar”.
Atletlər kəndində komanda üçün hər cür şəraitin yaradıldığını vurğulayan AMPK-nın prezidenti COVID-19-la əlaqədar problemlərin olduğunu da bildirib. Qeyd edib ki, atletlərimizin karantinə alınmasına, müəyyən məhdudiyyətlər tətbiq olunmasına baxmayaraq, onların yarışlara yaxşı hazırlaşa bilməsi üçün mümkün olan bütün addımlar atılır.
İ.Rəhimov deyib: “Çəkilən əziyyətin bəhrəsi artıq özünü göstərir, bu gün, yarışların ikinci günündə pauerliftinq üzrə idmançımız Pərvin Məmmədov uğurla çıxış edərək, ona göstərilən etimadı doğrultdu. Azərbaycan komandasına ilk medalı gətirdi. Bu münasibətlə hamını təbrik edirəm. Arzu edirəm ki, bu sonuncu medalımız olmasın. Hamını Azərbaycan paraolimpiyaçılarına dəstək olmağa çağırıram. Bizə bu dəstək medalların sayını artırmaq üçün lazımdır və bütün azarkeşlərimizə təşəkkür edirəm”.
Qeyd edək ki, Tokio Paralimpiadasının ikinci günündə - avqustun 26-da pauerliftinqçimiz Pərvin Məmmədov 49 kiloqram çəki dərəcəsində 156 kiloqramlıq nəticə göstərərək, bürünc medal qazanıb.
“Tokio-2020” paraolimpiya Oyunlarında ölkəmizi idmanın 6 növündə 47 kateqoriya üzrə rekord sayda - 36 idmançı təmsil edir.
XVI Yay Paralimpiya Oyunları sentyabrın 5-də təntənəli bağlanış mərasimi ilə başa çatacaq.
Bölmənin digər xəbərləri
