Bakı, 19 yanvar, Nicat Məmmədov, AZƏRTAC

Azərbaycanda təkcə paytaxt Bakıda deyil, regionlarda da atçılıq idmanının inkişaf etdirilməsi diqqət mərkəzində saxlanılır. COVID-19 pandemiyasına baxmayaraq, ölkəmizdə atçılıq idmanının inkişafı istiqamətində mühüm işlər görülüb, bir sıra turnirlər keçirilib. Azərbaycan Respublikası Atçılıq Federasiyasının (ARAF) vitse-prezidenti Bəhruz Nəbiyev AZƏRTAC-a məxsusi müsahibəsində bu istiqamətdə görülən işlərdən danışıb. Müsahibəni təqdim edirik.

- Bəhruz müəllim, ARAF ötən ili necə başa vurub? Federasiyanın ötənilki fəaliyyətinin yekunları ilə bağlı nə deyə bilərsiniz?

- Hazırda bütün istiqamətlərdə olduğu kimi, idman sahəsində də pandemiyanın təsirləri qalmaqdadır. Düzdür, ötən il vəziyyət daha gərgin olsa da, bu il nisbətən yaxşıdır. Buna baxmayaraq, biz idmanın bu növünün inkişafı ilə bağlı ARAF olaraq əlimizdən gələni etdik. Ötən il bir neçə yarış keçirdik. Beynəlxalq turnirlərdə iştirak edə bilmədiyimiz üçün yerli yarışların keçirilməsinə üstünlük verdik. Çalışdıq ki, geri qalmayaq. Daha dəqiq desək, konkur yarışlarının keçirilməsi və gənc idmançıların yetişdirilməsi ötən il prioritet istiqamət idi. Bu yarışlarda gənc idmançıların qarşısına bir sıra öhdəliklər qoyulmuşdu.

Ötən il ən vacib tədbirlərdən biri Böyük Britaniya Kraliçası II Elizabetin himayəsi altında keçirilən “Royal Vindzor” (Kral atcılıq) tədbiri idi. Pandemiya ilə əlaqədar bu tədbir ənənəvi qaydada təşkil olunmadı və may ayında deyil, iyunda keçirildi. Biz 80 ildir keçirilən bu mötəbər tədbirdə artıq beş dəfə iştirak etmişik. Azərbaycan bu dəfə də həmin tədbirdə böyük heyətlə iştirak etdi. Bu ilin mayında keçirilməsi planlaşdırılan bu tədbirə yenə də böyük heyətlə qatılacağıq. Builki tədbir özünəməxsusluğu ilə fərqlənəcək. Çünki bu il tədbir Kraliça II Elizabetin taxta çıxmasının 70 illik yubileyinə təsadüf edir. Artıq bu tədbirə dəvət də almışıq.

Ötən il ARAF bir sıra qurumla əməkdaşlığa başlayıb. Bu əməkdaşlıqdan ən vaciblərindən biri Kənd Təsərrüfat Nazirliyi ilə imzalanan saziş idi. Bilirsiniz ki, atçılığın inkişafı Kənd Təsərrüfatı Nazirliyinin də fəaliyyət sahəsinə daxildir. 2019-cu ildə Prezident İlham Əliyevin iştirakı ilə Ağcabədidə Qarabağ Atcılıq Kompleksinin açılışı oldu. Həmin kompleks Azərbaycanın milli at cinsi olan Qarabağ atlarının yetişdirilməsi ilə məşğul olur. Kompleks atçılıq idmanının inkişafında, cıdır yarışlarına bu müəssisədə yetişdirilən cins atların cəlb olunmasında mühüm rol oynayır. İdman ictimaiyyəti bu əməkdaşlığın nəticələrini bu ilin fevral-mart aylarında görməyə başlayacaq.

Ənənəvi yarışlardan olan çövkən oyunu üzrə “Prezident kuboku” turniri ötən ilin dekabrında yüksək səviyyədə keçirildi. Prezident İlham Əliyevin 60 illik yubileyinə həsr olunan həmin turnirdə bir ilkə imza atıldı. Belə ki, turnirdə yalnız DNT analizi nəticəsində valideyn mənsubiyyəti müəyyən edilmiş milli cins atların iştirakına icazə verildi. Bilirsiniz ki, Birinci vitse-prezident Mehriban Əliyevanın təşəbbüsü ilə UNESCO 2013-cü ildə atçılıq idmanı üçün vacib qərar qəbul etdi. Həmin qərara əsasən, Qarabağ atı üzərində oynanılan çövkən atüstü oyunu Azərbaycanın ən qədim atüstü oyunlarından biri hesab edilib. Çövkən oyununun məhz Qarabağ atı üzərində oynanan oyun kimi UNESCO-nun qeyri-maddi mədəni irs siyahısına salınması milli cinslərimiz olan Qarabağ və Dilbaz atlarının beynəlxalq yarışlarda iştirakını təmin etməyə imkan verəcək.

- Ölkəmizdə idmanın bu növünün inkişafı istiqamətində son illər mühüm tədbirlər həyata keçirilir. ARAF-ın da 2022-ci illə bağlı planları nədən ibarətdir? İl ərzində hansı mühüm turnirlərin keçirilməsi planlaşdırılır? Həmçinin idmançılarımızın hər hansı mötəbər turnirdə iştirakı nəzərdə tutulurmu?

- Biz hər ilin sonunda növbəti il üçün yerli və beynəlxalq turnirlərin cədvəlini tərtib edirik. Həmin cədvəl Gənclər və İdman Nazirliyinə də təqdim olunur. Bu il üçün xeyli sayda yarış planlaşdırılıb. Bu turnirlərə fevralda start veriləcək. Maraqlı məqam odur ki, artıq Olimpiya növləri olan - konkur, drisaj və üçnövçülük üzrə Avrasiya Assosiasiyası fəaliyyət göstərir. Üzv olduğumuz bu Assosiasiya Şərqi Avropa, Orta Asiya və Qafqaz ölkələrini əhatə edir. Əksər turnirlərin Moskvada keçirilməsi planlaşdırılır. Artıq bu turnirlərdə iştirak edəcək milli komandamızın heyətini də formalaşdırmışıq.

Bir neçə gün əvvəl gənclər və idman naziri Fərid Qayıbov ilə mühüm və məhsuldar görüşümüz oldu. Nazir atçılıq kompleksi və federasiyanın fəaliyyəti ilə yaxından tanış oldu. Bir sıra çatışmazlıqlar və ehtiyac duyduğumuz məsələlər barədə nazirə məlumat verdik. Xüsusilə yeni atların alınması məsələsində nazirliyin dəstəyinə böyük ümid bəsləyirik. Olimpiadaya hazırlıq prosesində də lazımi dəstəyin göstəriləcəyinə inanırıq.

Yanvarın sonunda İsveçrənin Sankt-Moritz şəhərində artıq 35-ci dəfə keçiriləcək “Qar polosu” dünya kubokunda da iştirak edəcəyik. Əvvəllər dörd komandanın qatıldığı bu yarışın reqlamentində dəyişiklik edilib. Belə ki, bu ildən dünya kubokunda altı komanda mübarizə aparacaq. Azərbaycan turnirdə “Land of Fire” (Odlar Yurdu) komandası ilə təmsil olunacaq. Həmin yarışda hədəfimiz böyükdür. İndiyə qədər həmin yarışdan qalib ayrılmasaq da, bu dəfə məqsədimiz çempion olmaqdır. Çünki bu turnirə uzun müddətdir ciddi hazırlaşırıq.

Mayda Londonda keçiriləcək daha bir mötəbər yarışda mübarizə aparacağıq. Əgər əvvəllər biz bu yarışların bədii hissəsində Azərbaycanın mədəniyyətini, musiqisini, milli atlarını təbliğ edirdiksə, bu dəfə planlarımız fərqlidir. Belə ki, bədii hissə ilə yanaşı, yarışlarda da iştirak edəcəyik. Ən yüksək səviyyədə dəvət aldığımız həmin turnir mayın 12-dən 15-dək baş tutacaq.

Bu il komandamız pandemiya ilə əlaqədar iki dəfə təxirə salınan və cari ilin sentyabrında keçirilməsi nəzərdə tutulan polo üzrə Avropa çempionatında da iştirak etməyi planlaşdırır. Komandamız bu turnirə də ciddi hazırlaşır. Çempionatda Azərbaycan komandası ilə yanaşı, Avropanın ən güclü poloçuları da yarışacaqlar. Bu komandaların tam siyahısı yaxın həftələrdə açıqlanacaq. Ümidvarıq, Azərbaycan bu turniri də yüksək səviyyədə keçirəcək.

- Azərbaycanda atçılıq idmanının inkişafı, gənc idmançıların yetişdirilməsi istiqamətində hansı addımlar atılır?

- ARAF həm federasiyada, həm də klublarda gənc idmançıların hazırlığına böyük önəm verir və bu istiqamətdə işlər mütəmadi həyata keçirilir. Azərbaycanda bir idman məktəbi fəaliyyət göstərir. Həmin məktəb Gənclər və İdman Nazirliyinin nəzdindəki Bakı Dövlət Cıdır Meydanının ərazisində yerləşir. Bu məktəbin inkişaf etdirilməsi üçün təkliflər hazırlayırıq. Həmin təklifləri Gənclər və İdman Nazirliyinə təqdim edəcəyik. Təkliflərdə həm maddi-texniki bazanın gücləndirilməsi, həm də gənc idmançıların idmanın bu növünə cəlb olunması nəzərdə tutulur. Bu məsələ ilə bağlı klublara da müraciət ünvanlamışıq. Klublar gənc idmançıların yetişdirilməsi üçün ciddi səy göstərir. Gərgin əməyin nəticəsində perspektivli idmançıların yetişdiyini görürük. Keçən il uşaqlar arasında keçirilən çempionatda idmançılarımız gözəl nəticələr ortaya qoydular. ARAF gənc idmançıların yetişdirilməsi istiqamətində klublarla işi davam etdirir. İdmanın bu növünə cəlb etmək üçün əsasən azyaşlı uşaqlara üstünlük veririk.

- İşğaldan azad olunan ərazilərimizdə atçılıq bazasının inkişaf etdirilməsi üçün nə kimi tədbirlərin həyata keçirilməsi planlaşdırılır?

- Biz bir neçə ay əvvəl bu haqda çox gözəl xəbər aldıq. Prezident İlham Əliyev Ağdam rayonunda olarkən bir məsələni xüsusi vurğulamışdı. Ağdamda atçılıq zavodunun əvvəllər yerləşdiyi yerdə, yəni, Eyvazxanlı kəndində fəaliyyət göstərməsi barədə dövlətimizin başçısının göstərişi və tapşırığı atçılıq idmanının azarkeşləri kimi, bizi də hədsiz sevindirdi. Çünki Ağcabədi rayonundakı Qarabağ Atcılıq Kompleksi ərazilərimizin işğal olunmasından sonra tikilib. Ancaq Ağdam rayonunun Eyvazxanlı kəndinin Qarabağ atlarının yetişdirilməsi işində mühüm yeri var. Kənd Təsərrüfatı Nazirliyi ilə görüşdə həmin komplekslə bağlı bütün layihələndirmə prosesinin başa çatmaq üzrə olduğu qeyd edildi. Hətta həmin ərazidə böyük hippodromun tikintisi də nəzərdə tutulur. Həmin ərazidə həm atlar yetişdiriləcək, həm də yarışlar keçiriləcək.