1 İYUN – UŞAQLARI BEYNƏLXALQ MÜDAFİƏ GÜNÜ QEYD EDİLMİŞDİR
Bakı, 1 iyun (AZƏRTAC). 1 İyun - Uşaqları beynəlxalq müdafiə günü münasibətilə Gənclər və İdman Nazirliyi və Ailə, Qadın və Uşaq Problemləri üzrə Dövlət Komitəsi Milli Parkda uşaqlar üçün musiqili-əyləncəli tədbir keçirmişlər.
Tədbirdə gənclər və idman naziri Azad Rəhimov, Azərbaycan Respublikasının insan hüquqları üzrə müvəkkili Elmira Süleymanova, Ailə, Qadın və Uşaq Problemləri üzrə Dövlət Komitəsinin (AQUPDK) sədri Hicran Hüseynova, Milli Məclisin deputatı Qənirə Paşayeva və ictimaiyyətin nümayəndələri iştirak etmişlər.
AQUPDK-nın sədri Hicran Hüseynova bildirmişdir ki, tədbir 2009-cu il “Uşaq İli” çərçivəsində keçirilir.
Tədbirə uşaq müəssisələrindən və əqli, fiziki cəhətdən qüsurlu uşaqların da dəvət edildiyini deyən H.Hüseynova vurğulamışdır ki, bizim məqsədimiz gənclərin və uşaqların vətənpərvərlik ruhunda tərbiyəsidir. Arzumuz budur ki, onlar Azərbaycanın layiqli vətəndaşı kimi böyüsünlər.
O, ölkəmizdə uşaqların bütün problemlərinin qısa müddətdə həllinə çalışdıqlarını da diqqətə çatdırmışdır.
“Uşaq aləminə səyahət” devizi altında keçirilən tədbirdə istedadlı uşaqların, rəssamların, yaradıcı kollektivlərin, eləcə də idmançıların iştirakı ilə əyləncəli idman proqramları, teatr səhnəcikləri nümayiş etdirilmişdir.
Bölmənin digər xəbərləri
