İDMAN
2019-cu ildə dörd Formula 1 festivalı keçiriləcək
Bakı, 31 yanvar, AZƏRTAC
Formula 1 rəhbərliyi 2019-cu ildə dörd yürüş festivalı hazırlayır.
AZƏRTAC “RaceFans”a istinadla xəbər verir ki, qarşıdan gələn mövsümdə festivallar üç ölkədə - aprel ayında, Çin Qran-Prisi ərəfəsində Şanxayda keçiriləcək və dünya çempionatı tarixində mininci Qran-Priyə həsr olunacaq. İki festival ABŞ-da nəzərdə tutulub: Kanada Qran-Prisindən əvvəl Çikaqoda və oktyabr ayında Ostin mərhələsi ərəfəsində Los-Ancelesdə.
Daha bir festival Braziliya Qran-Prisi ərəfəsində Rio-de-Janeyroda keçiriləcək. Maraqlıdır ki, ötən il festivallar dörd başqa şəhərdə - London, Marsel, Milan və Mayamidə təşkil edilib.
Xatırladaq ki, Formula 1-in mövsümqabağı testləri fevralın 19-da Barselonada başlayacaq. Mövsümün birinci yürüşü martın 17-də Avstraliyada keçiriləcək.