2024-cü ildə Böyük Britaniyada irimiqyaslı moda sərgiləri keçiriləcək
Bakı, 16 yanvar, AZƏRTAC
Bu il Böyük Britaniyada bir neçə irimiqyaslı moda sərgilərinin keçiriləcəyi gözlənilir.
AZƏRTAC xarici KİV-lərə istinadla 2024-cü ildə moda aləmi ilə bağlı tədbirlərin xülasəsini təqdim edir.
İngiltərənin paytaxtında yerləşən Dizayn Muzeyində fevralın 11-də təşkil olunacaq sərgidə 300 gənc dizaynerin əl işləri təqdim ediləcək. “Üsyankar: London modasının 30 ili” adlı ekspozisiya Londonun unikal moda mədəniyyətini nümayiş etdirir. Sərgi həm də Britaniya Moda Şurasının “NewGen” proqramının 30 illiyinə həsr edilib. Şouda Britaniya moda dünyasının ən parlaq dizaynerlərinin yaratdığı, demək olar ki, birinci nümayişdən nəinki məşhurların, eləcə də peşəkarların marağına səbəb olan obrazlar təqdim olunub.
Bununla paralel olaraq, Viktoriya və Albert Muzeyində əfsanəvi fransalı kutyure Qabriel “Koko” Şanelin yaradıcılığına həsr olunmuş sərgi keçirilir. “Qabriel Şanel, moda manifesti” adlı sərgi “Chanel” moda evinin yaradılmasına və dizaynerin bu gün də qadınların geyim tərzinə öz təsirini göstərməkdə davam edən dəb modellərinin təkamülünə həsr olunub. Sərgi fevralın 28-dək davam edəcək.
“Diva” sərgisi bir neçə başqa ölkədə açılmazdan əvvəl hazırda Londonda Viktoriya və Albert Muzeyində keçirilir. “Diva” sözünün mənasını öyrənmək kimə maraqlıdırsa, o halda mütləq bu sərgiyə baş çəkməlidir. Sərgi bir vaxtlar mübahisəli, əvvəlcə “ilahə” anlamını verən termini tədqiq edir və yenidən mənalandırır. Burada tanınmış moda evlərinin, Merayya Keri, Tina Törner, Şirli Bessi, Şer, Rihanna və Billi Ayliş kimi “diva”ların geyindiyi 60-dan artıq obraz və kostyumlar təqdim olunur. Sərgi aprelin 7-dək davam edəcək.
İngiltərənin cənubunda Oksfordşir qraflığındakı Vudstok şəhərində yerləşən Blenheym sarayında martın 23-dən iyunun 30-dək Britaniya moda aləminin ikonalarına, o cümlədən Stella Makkartni, Bryus Oldfild və Vivyen Vestvuda diqqət ayrılacaq. Bu defile keçmişin və dövrümüzün modasına həsr edilib və hazırda ən iri sərgi hesab olunur.
Barbi haqqında filmə baxandan sonra dəbli kukladan “doymayanlar” Londonda Dizayn Muzeyində Barbi aləminə baş vura bilərlər. Yaydan başlayaraq, muzeydə bu məşhur kuklanın 65 illik xronologiyası təqdim olunacaq. Barbinin tarixi 1959-cu ildə, Rut Hendler öz qızı Barbara üçün tarixçə yaratmaq istəyəndə başlayıb. Sərgi dünyada ən məşhur kuklalardan birinin təkamülünü dizaynın, o cümlədən moda, memarlıq, mebel və avtomobil dizaynının köməyi ilə tədqiq edir. Dizayn Muzeyi illərlə hazırlanan sərgi üçün Kaliforniyada Barbinin arxivlərinə əlçatanlıq əldə edib. “Barbi” sərgisi 2024-cü il iyulun 5-dən 2025-ci il fevralın 23-dək davam edəcək.
Bölmənin digər xəbərləri
