REGİONLAR
Yardımlıda 3000 hektar sahədə taxıl əkini yekunlaşıbVİDEO
Yardımlı, 15 noyabr, İsmayıl Cəfərli, AZƏRTAC
Əhalisinin əsas məşğuliyyəti heyvandarlıq və əkinçilik olan Yardımlıda taxıl səpini başa çatmaq üzrədir. Taxılçılar dağlar diyarında növbəti təsərrüfat ili üçün bol məhsul yetişdirmək əzmindədirlər.
AZƏRTAC xəbər verir ki, Yardımlıda ən çox taxıl əkilən ərazilərdən biri də Bilnə ərazi vahidliyidir. Ərazi üzrə 200 hektardan çox taxıl əkiləcək sahələrdə son səpin işləri aparılır. Bilnə kənd sakini Sadatxan Nəzərov uzun illərdir taxıl və digər kənd təsərrüfatı bitkiləri əkib-becərir. Bu il də ənənəsinə sadiq qalan təsərrüfat sahibi 2,5 hektar pay torpağında buğda əkir. Yardımlı fermerləri əsasən Cəlilabadın toxumçuluq müəssisələrindən əldə etdikləri sertifikatlı toxumlardan istifadə edirlər. Bu toxumlar həm yüksək məhsuldarlığı, həm də xəstəlik və zərərvericilərə qarşı davamlı olmasına görə seçilir. Dəmyə şəraitində əkildiyindən məhsuldarlıq hava şəraitindən asılıdır. Əkindən sonra yağışlar vaxtında düşərsə, taxıl da bol olar.
Fermerlər əkini növbəli üsulla əkməyə üstünlük verirlər: “Əkdiyimiz sahəni bir dəfə malalamışıq, indi isə ikinci dəfə malalayırıq. Texnika sarıdan çətinliyimiz olmur. Məhsuldarlıq da yaxşı olur. Özümüz öz məhsulumuzla dolanırıq. Dövlətimizin kənd təsərrüfatı üçün ayırdığı subsidiyadan yararlanırıq”.
Yardımlıda ümumilikdə 12 min hektar əkinəyararlı torpaq sahəsi var. Bu günədək 3800 hektar payızlıq şum vurulan sahələrin 3000 hektarında taxıl səpini başa çatdırılıb. Bunun 300 hektarında payızlıq arpa, 2700 hektarında payızlıq sertifikatlı toxumlar əkilib.
Rayon Dövlət Aqrar İnkişaf Mərkəzinin baş məsləhətçisi Taleh İbayev bildirib ki, bu il əkin sahəsi ötən ilə nisbətən 500 hektar çoxdur. Vətəndaşların əkin sahəsinə olan marağının artması, ərzaq qıtlığının aradan qaldırılması, yüksək məhsuldarlıq əldə edilməsi ilə əlaqədar rayonda maarifləndirici işlər aparılıb. Ona görə də bu il keçən ilə nisbətən fermerlərin həm sayı, həm də əkin sahəsi 500 hektar artıb.
Keçən il Yardımlıda 3100 fermer qeydiyyatdan keçib. Sahələrdən 25-27 sentner arasında məhsuldarlıq gözlənilir.