Bakı, 26 iyun, Məmməd İsayev, AZƏRTAC

Dövlətin qüdrətini şərtləndirən amillər sırasında iqtisadi yüksəliş və güclü ordu daha böyük rola malikdir. Bu gün qürurla deyə bilərik ki, ölkəmiz iqtisadi və siyasi nailiyyətlərə imza atmaqla yanaşı, ordu quruculuğu prosesində də böyük uğurlar əldə edib.

Bu gün əsası Azərbaycan Xalq Cümhuriyyəti dövründə qoyulmuş Azərbaycan Ordusunun tarixi ənənələri yeni müstəvidə qorunub saxlanılır, inkişaf etdirilir. Bu gərəkli iş Ümummilli Lider Heydər Əliyevin ciddi səyləri nəticəsində mümkün oldu. Ölkəmizdə peşəkar ordu quruculuğunun əsası 1993-cü ilin sonlarında qoyuldu. Ulu Öndər Heydər Əliyev xalqın təkidli tələbi ilə hakimiyyətə gəldikdən sonra həm Prezident, həm də Ali Baş Komandan olaraq, ordunun qüdrətli olmasına diqqət yönəltdi. Ordu vahid komandanlıq ətrafında birləşdirildi və nizami ordu yaradıldı. Məhz həmin vaxtdan ordu quruculuğuna elmi prinsiplərlə yanaşıldı, ordu siyasi təsirlərdən xilas edildi.

Bu gün Ali Baş Komandan İlham Əliyev Ulu Öndərin siyasi kursunu uğurla davam etdirir. Prezidentin rəhbərliyi ilə həyata keçirilən müdrik siyasət nəticəsində hazırda ordumuz Cənubi Qafqazın ən güclü ordusudur. Bunu beynəlxalq ekspertlər də etiraf edirlər.

Son illər Azərbaycan hərbi potensialını xeyli artırıb. Ölkəmizə ən müasir silah-sursat, texnika, avadanlıq gətirilib. Hazırda maddi-texniki təchizat və döyüş qabiliyyəti baxımından Azərbaycan Silahlı Qüvvələri dünyanın ən güclü orduları sırasındadır. 2020-ci il sentyabrın 27-dən noyabrın 10-dək davam edən Vətən müharibəsi Azərbaycanın tarixi Zəfəri ilə başa çatdı. Ölkənin ərazi bütövlüyü bərpa edildi. Bu tarixi qələbə, Prezident, Müzəffər Ali Baş Komandan İlham Əliyevin iradəsi və rəşadətli Ordumuzun döyüş meydanında sərgilədiyi şücaəti ilə qazanıldı. Biz öz əzəli torpaqlarımıza alnıaçıq, Zəfər bayrağı ilə qayıtdıq. Dekabrın 10-da Bakıda Zəfər paradı keçirildi. Azadlıq meydanı bir çox hadisələrin şahidi oldu. Zəfər paradı düşmənə, onun havadarlarına xatırlatdı ki, Azərbaycan Ordusu güclü ordudur.

Hərbi Hava Qüvvələri də digər qoşun növləri kimi torpaqlarımızın azad edilməsində xüsusi xidmətləri ilə yadda qaldı

AZƏRTAC-la həmsöhbət olan hərbi qulluqçularımız müsahibələrində Azərbaycan Silahlı Qüvvələrinin 105 illik yubileyinin Qələbə təntənəsində qeyd edilməsindən qürur duyduqlarını bildiriblər.

Hərbi Hava Qüvvələrinin zabiti, baş leytenant Sərxan Qurbanov deyib: “Yeddi ildir ki, hərbi xidmətdəyəm. Hərbçi olmağımın əsasında Vətən sevgisi, xalqımıza layiqli xidmət etmək dayanır. Xidmətimin ən yadda qalan dövrünü Vətən müharibəsində yaşadım. Neçə ildir humanist yanaşmamıza təxribatlarla cavab verən düşmənin 2020-ci il sentyabrın 27-dəki əməlləri onlara baha başa gəldi. Məsələnin sülh yolu ilə həllinə çalışsaq da, düşmənin namərd davranışları müharibəni qaçılmaz edirdi. Əslində müharibənin başlanması bizim üçün də sevindirici oldu. Şükürlər olsun ki, Ali Baş Komandan, Prezident İlham Əliyevin rəhbərliyi ilə Azərbaycan Ordusu misli görünməmiş şücaət göstərərək 30 illik işğala 44 gündə son qoydu. Hərbi Hava Qüvvələri də digər qoşun növləri kimi torpaqlarımızın azad edilməsində xüsusi xidmətləri ilə yadda qaldı. Belə ki, təyin olunmuş bütün düşmən obyektlərinin vurulması yüksək dəqiqliklə yerinə yetirildi. Təəssüf ki, müharibə vaxtı öz peşəkarlığı və əzmkarlığı ilə seçilən pilotumuz polkovnik Zaur Nudirəliyev şəhid oldu. Onun kimi təcrübəli zabiti itirmək hər birimiz üçün çox ağır idi”.

Müharibə ilə bağlı xatirələrini bölüşən zabit söhbətinə belə davam edib: “Həmin dövrdə mənim atamın vəziyyəti çox ağır idi. Dəfələrlə mənə zəng edərək gəlməyimi istədi. Mən isə ona torpaqlarımızın hər qarışı uğrunda gərgin döyüşlərin getdiyini, silahdaşlarımı qoyub gələ bilməyəcəyimi söylədim. Müharibənin sonlarına yaxın atamın dünyasını dəyişməsi xəbərini aldım. Təbii ki, atamla vidalaşmaq istərdim, amma müharibənin qızğın yerində döyüş meydanından çəkilə bilməzdim. İnanıram ki, atam da buna görə məndən inciməz, əksinə mənimlə fəxr edər. Bibim oğlu da Vətən müharibəsində şəhadətə ucalanlar arasında oldu. Bir neçə dəfə yaralansa da, hospitalda müalicəsini yarımçıq qoyub yenidən döyüş meydanına qayıdıb. Şəhid olan döyüş yoldaşlarını təxliyə etmək istəyərkən ağır yaralanıb. Bir gün sonra mühasirədən çıxsa da, həyatını xilas edə bilməyiblər. Düşünürəm ki, mən onun da qisasını ala bildim”.

Qalib Ordumuzun hərbçisi olmaqdan qürur duyuram

Azərbaycan Ordusunun baş leytenantı Əmirbəy Ramaldanov bildirib ki, 105 illik tarixin bir parçası olmaq, xüsusilə də qalib Ordumuzun hərbçisi olmaq hisslərini sözlə ifadə etmək mümkün deyil. Ordumuzun şanını dünyaya yayan, sıravi əsgərindən yüksək rütbəli zabitinədək hər kəsin ön cəbhədə gözünü qırpmadan irəli atdığı Vətən müharibəsi bizim özümüzə olan inamımızı geri qaytardı. Doğrudur, hər zaman əmin idik ki, müharibə olarsa, mütləq qalib olacağıq. Lakin bunu yaşamaq, yağış kimi yağan güllələrin altında qorxmadan irəli getmək, döyüş meydanında ardıcıl qələbələr qazanaraq Böyük Zəfərə çatmaq insanı bir başqa cür qürurlandırır.

Azərbaycan Ordusunun illərdir başımıza gətirilənlərin qisasını almaq üçün bu müharibəni gözlədiyini deyən baş leytenant fikirlərinə belə davam edib: “İrəli atılanda Birinci Qarabağ müharibəsi dövründə olanları, soyqırımları, Xocalı hadisələrini, ara-sıra edilən təxribatları, şəhid olan döyüş yoldaşlarımızı gözlərimizin qarşısına gətirirdik. Yaxın dostum baş leytenant Həsən Rzazadə və bibim oğlu polkovnik-leytenant Babək Ramaldanov yanımda şəhid oldu. Bundan sonra Allahdan başqa heç bir qüvvə bizi saxlaya bilməzdi. Həm ön, həm də arxa cəbhədə, hamılıqla vuruşduq. Bütöv bir yumruq olaraq döyüşdük. Mənim olduğum bölmə Cəbrayıl, Qubadlı, Laçın rayonları istiqamətlərində döyüşlərdə iştirak. Qələbə xəbərini noyabrın 8-də Laçın rayonun Suarası kəndində aldıq. İlk növbədə Şuşanın azad olunması xəbərini eşitdik. Həmin an keçirdiyimiz hissləri sözlə ifadə etmək qeyri-mümkündür. Bircə onu bildim ki, qeyri-ixtiyarı hər kəsin gözlərindən yaş süzüldü. Şuşa bizim yaralı yerimiz idi. O xəbəri alanda duyğulanmamaq mümkün deyildi. Növbəti gün gecə saatlarında isə Ermənistanın kapitulyasiyası xəbərinə sevindik. Ən çox isə missiyamızı uğurla tamamlamaq bizi xoşbəxt etdi. O an bütün şəhid silahdaşlarımıza minnətdarlığımızı ifadə etdik. Hazırda hər birimiz Qarabağa ayaq basanda şəhidlərimizə rəhmət oxuyur, qazilərimizə cansağlığı diləyirik. Biz bu qələbəni xalq olaraq qazandıq, ədaləti həmrəyliyimiz sayəsində bərpa etdik”.

Qeyd edək ki, Əmirbəy Ramaldanov “Azərbaycan Bayrağı” ordeni və “Cəbrayılın azad olunmasına görə”, “Qubadlının azad olunmasına görə”, “Laçının azad olunmasına görə” və “Vətən müharibəsi iştirakçısı” medalları ilə təltif olunub.

Zəfərin dadı başqa olsa da qazanılması elə də asan deyil

3-cü dərəcəli “Rəşadət” ordeni, “Füzulinin azad olunmasına görə” və “Vətən müharibəsi iştirakçısı” medalları ilə təltif olunmuş kapitan Sənan Məmmədov qeyd edib ki, 105 yaşlı Azərbaycan Ordusu tarixinin ən şanlı səhifəsini məhz 2020-ci ilin payızında yaşadı. Belə ki, həmin il sentyabrın 27-dən noyabrın 10-na qədər davam edən Vətən müharibəsi Azərbaycanın tarixi Zəfəri ilə başa çatdı və ölkəmizin ərazi bütövlüyü bərpa olundu. Həmin tarixi Qələbə, ilk növbədə, Ordumuzun döyüş meydanında sərgilədiyi şücaəti ilə qazanıldı. Mən də Azərbaycanın qalib Ordusunun zabiti olmaqdan fəxr edirəm. Azərbaycan Ordusunun hərbi qulluqçuları həmişə bu qürur hissini yaşamaq üçün daim üzərlərində çalışıb, döyüş hazırlığımızı həmişə yüksək səviyyədə tutub. 44 günlük İkinci Qarabağ müharibəsində Müzəffər Ali Baş Komandanın rəhbərliyi ilə rəşadətli Ordumuz 30 illik torpaq həsrətinə son qoydu. Bizi vüsala çatdıran Qələbə Azərbaycanın işğal altındakı bütün əraziləri üzərində suverenliyinin bərqərar olunduğu böyük gün oldu.

Vətən müharibəsində döyüş yolunun Füzulinin Alxanlı kəndi istiqamətindən başladığını diqqətə çatdıran S.Məmmədov rayonun Qarğabazar, Kürdlər, Yuxarı Əbdürrəhmanlı kəndlərinin azad edilməsi uğrunda savaşdığını bildirib: “İkinci dəfə yaralandığım üçün döyüşü davam etdirə bilmədim. Ancaq mənim də sıralarında olduğum bölmələr Füzulinin İşıqlı, Gecəgözlü, Yuxarı Aybasanlı kəndləri, həmçinin Xocavənd istiqamətlərində mübarizəni davam etdirdilər. Şuşanın azad edilməsi xəbərini Gəncədə hospitalda eşitdim. Artıq üçüncü ildir ki, ordumuz öz bayramını Zəfər təntənəsi ilə qeyd edir. Bir hərbi qulluqçu üçün Qələbəyə gedən yolda bütün çətinlikləri inamla 44 günə dəf etmək böyük şərəfdir. İşğalçı Ermənistan ordusunu və Ohanyan səddini darmadağın etmək üçün 44 günün yetərli olmasında əsas amil qisas hissimiz idi. Yəni biz müharibədə qardaşı şəhid olan əsgərimizin gözünü qırpmadan və bir damla göz yaşı tökmədən döyüşünü davam etdirməsinin şahidi olduq. Odur ki, Vətən müharibəsində Zəfərin qazanılmasında Azərbaycan xalqının və əsgərinin ürəyindəki Vətən sevgisi, döyüşmək əzmi mühüm rolu oynadı. Müharibədə düşmənlə qarşılaşdığımız zaman silahdaşlarımızın şəhid olmasını xatırlayıb, intiqam hissləri ilə döyüşümüzü davam etdirirdik.

Biz həlledici Zəfərə addım-addım çatdıq. Döyüş meydanlarında dəfələrlə sınaqlardan üzüağ çıxdıq. Vətən müharibəsi isə ən böyük imtahanımız oldu. Çox şükür ki, həmin müharibə dünya hərb tarixinə düşəcək Şanlı Qələbə ilə yekunlaşdı”.