Otuz bir il əvvəl şəhid olan Nurəli Abdullayev torpağa tapşırılıb VİDEO
Bakı, 25 avqust, AZƏRTAC
Otuz bir il əvvəl Şuşada - Daşaltı uğrunda gedən döyüşlərdə şəhid olan Nurəli Abdullayev paytaxtın Suraxanı rayonunun Bülbülə qəsəbəsində Şəhidlər xiyabanında torpağa tapşırılıb.
AZƏRTAC xəbər verir ki, dəfn mərasimində şəhidin ailə üzvləri ilə yanaşı, Müdafiə Nazirliyinin, rayon ictimaiyyətinin nümayəndələri, sakinlər, qazilər, media nümayəndələri iştirak ediblər.
Şəhid Nurəli Abdullayev əsgəri ənənələrə uyğun olaraq yaylım atəşi və Azərbaycan Respublikasının Dövlət Himninin sədaları altında torpağa tapşırılıb.
Dəfn mərasimində şəhidlərimizin ruhuna dualar oxunub, xalqımıza və dövlətimizə sülh və əmin-amanlıq arzulanıb, şəhidin məzarına tər güllər düzülüb, Suraxanı Rayon İcra Hakimiyyətinin adından əklil qoyulub.
Şəhidlə bağlı xatirələrini bölüşən qardaşı Hacıəli Abdullayev deyib: “Müharibədən sonra qardaşımı çox axtardıq, lakin onu tapmaq bizə 31 il sonra qismət oldu. Sonuncu dəfə qardaşımı müharibə yeni başladığı zaman görmüşəm. Müharibənin ilk vaxtları hər toqquşmadan sonra əsgərlər qısa müddətlik evə gəlib, daha sonra yenidən cəbhəyə yollanırdılar. Qardaşımın ayağında yarası var idi, qorxurdu ki, birdən onu müharibəyə göndərməzlər. Axırıncı dəfə evə gəldiyi günün səhəri oyananda gördüm ki, anam ağlayır. Qardaşımın yaralı vəziyyətdə yenidən müharibəyə getdiyini öyrəndim. Onun fikrindən atamın gözləri tutuldu, daha sonra valideynlərimin hər ikisi vəfat etdi.
Anam qardaşıma evlənməsi üçün tez-tez təzyiq göstərirdi. Qardaşımın ona cavabını heç unutmuram. O, həmişə deyərdi ki, “Vətənin ən çətin vaxtlarında mən necə evlənim?! Gedib şəhid olsam, ailəm gözüyaşlı qalmasın”. Məhz bu səbəbdən Nurəli evlənmədi.
Şuşanın azad olunduğunu eşidərkən sevincdən ağladım. Mən bilirəm ki, Nurəli və onun timsalında bütün şəhidlərin ruhu azad Şuşanın səmasında dolanır. Arzulayıram ki, bütün itkinlər tapılsın və doğmalarının gözləri yollarda qalmasın”.
Şəhidin döyüş yoldaşı Nizami Mehdiyev onu vətənpərvər, döyüşkən, qəhrəman, mərd, cəsarətli döyüşçü kimi xatırladığını diqqətə çatdırıb: “Nurəli Abdullayev həm mənim döyüş yoldaşım, həm də bibim oğludur. Daşaltı əməliyyatına gedən zaman bilirdik ki, oradan sağ çıxmaq şansımız çox azdır. Lakin hər şeyi gözə alaraq döyüşə yollandıq. Təəssüf ki, Nurəli və onun kimi döyüşçü yoldaşlarımızın bir çoxunu itirdik. Şükürlər olsun ki, 31 ildən sonra onu adına layiq şəkildə dəfn edə bildik. Vətən müharibəsində Ali Baş Komandan İlham Əliyev və Azərbaycan Ordusunun əldə etdiyi parlaq Qələbə həm bizim - Birinci Qarabağ müharibəsi qazilərinin illərdir çəkdiyi iztiraba son qoydu, həm də şəhidlərimizin narahat ruhlarını şad etdi”.
Qeyd edək ki, şəhid Nurəli Abdullayev 1960-cı il dekabrın 19-da Bakı şəhərinin Suraxanı rayonunda anadan olub. 1992-ci il yanvarın 26-da Şuşa rayonunun Daşaltı kəndi ərazisində gedən döyüşlər zamanı itkin düşüb. Bir neçə gün öncə o, Daşaltı kəndi ərazisində qalıqları aşkar edilmiş yeddi nəfərdən biridir.
Bölmənin digər xəbərləri
