28 May - Respublika Günü münasibətilə Aşqabadda rəsmi qəbul təşkil edilib
Aşqabad, 31 may, AZƏRTAC
Azərbaycanın Türkmənistandakı səfirliyi 28 May - Respublika Günü münasibətilə rəsmi qəbul təşkil edib.
Qəbulda Türkmənistan Nazirlər Kabineti sədrinin müavini Sapardurdı Toyliyev, digər rəsmi şəxslər və ictimai xadimlər, Aşqabadda akkreditə olunmuş diplomatik korpusun rəhbərləri və soydaşlarımız iştirak ediblər.
Tədbirdə əvvəlcə Azərbaycan və Türkmənistanın dövlət himnləri səsləndirilib.
Səfir Həsən Zeynalov Azərbaycan Demokratik Respublikasının (ADR) müsəlman Şərqində yaradılmış ilk demokratik cümhuriyyət olduğunu bildirərək onun yaradılması tarixi, mövcud olduğu qısa müddətdə dövlət quruculuğunun müxtəlif sahələrində həyata keçirdiyi mütərəqqi islahatlar, ADR-in dünya səviyyəsində tanıdılması istiqamətində görülmüş tədbirlər barədə məlumat verib. Bildirilib ki, 1991-ci ildə Azərbaycan yenidən müstəqilliyə qovuşub və müstəqil Azərbaycan Respublikası o zamankı demokratik respublikanın varisi olub. XX əsrin 90-cı illərinin əvvəllərində müstəqil Azərbaycan torpaqlarının işğalı, iqtisadi tənəzzül və daxili qeyri-sabitlik kimi problem və təhdidlərlə üz-üzə qalıb. Yalnız ulu öndər Heydər Əliyevin xalqın təkidli tələbi ilə hakimiyyətə qayıdışından sonra ölkədə siyasi sabitlik bərqərar olub. Neft strategiyasının, xüsusən Azərbaycanın karbohidrogen ehtiyatlarının beynəlxalq bazarlara çıxarılması məqsədilə aparıcı xarici şirkətlərlə imzalanmış müqavilələr Azərbaycan Respublikasının müstəqilliyinin gücləndirilməsi yönündə atılmış mühüm addımlardan olub.
Hazırda Ulu Öndərin siyasi kursunun Prezident İlham Əliyev tərəfindən uğurla davam etdirildiyi, iqtisadi, sosial, ordu quruculuğu, Azərbaycanın beynəlxalq nüfuzunun gücləndirilməsi istiqamətində böyük nailiyyətlərin qazanıldığı qeyd edilib. H.Zeynalov hazırda ölkəmizdə qeyri-neft sektorunun inkişaf etdirilməsinin qarşıda duran prioritet vəzifələrdən biri olduğunu vurğulayıb. Bu mənada kənd təsərrüfatı, sənaye, turizm, nəqliyyat, informasiya-kommunikasiya texnologiyaları və digər sahələrin inkişaf etdirilməsinə ciddi fikir verildiyi, həmin sahələrlə bağlı göstəricilər üzrə müsbət dinamikanın müşahidə olunduğu diqqətə çatdırılıb. Regionda Azərbaycan Respublikasının fəal iştirakı ilə enerji və nəqliyyat sahələrində meqa layihələrin yerinə yetirildiyi qeyd olunub. Ölkəmizin enerji təhlükəsizliyinin təminində vacib rol oynadığı, “Cənubi Qaz Dəhlizi” layihəsinin icrasının davam etdirildiyi bildirilib. Eyni zamanda, Şərq-Qərb və Şimal-Cənub istiqamətlərində nəqliyyat dəhlizlərinin inkişaf etdirilməsi yönündə tədbirlərin görüldüyü, Bakı-Tbilisi-Qars dəmir yolu xəttinin istifadəyə verilməsindən sonra Avropa ilə Asiya arasında ən qısa marşrutun yaranacağı diqqətə çatdırılıb. Həmçinin son illərdə Azərbaycanda müdafiə sənayesi sahəsinin uğurla inkişaf etdirildiyi, bu sahədə nəzərəçarpan nəticələrin əldə olunduğu və ölkənin müdafiə qabiliyyətinin xeyli gücləndiyi bildirilib. Ordumuzun Azərbaycan Respublikasının ərazi bütövlüyünü qısa müddətdə bərpa etmək iqtidarında olduğu vurğulanıb.
Səfir 2016-cı ilin Azərbaycanda “Multikulturalizm ili” elan olunması, müxtəlif millətlərin, ayrı-ayrı dinlərə etiqad edən insanların əsrlər boyu ölkəmizdə sülh şəraitində yaşamaları barədə məlumat verib. O, ölkəmizin beynəlxalq nüfuzunun gündən-günə artdığını söyləyərək son illərdə Azərbaycanda dünya səviyyəli mötəbər tədbirlərin keçirildiyini diqqətə çatdırıb.
Diplomat Azərbaycan-Türkmənistan əlaqələrinə də toxunub. O, əlaqələrin uğurla inkişaf etdiyini, Azərbaycan və Türkmənistan xalqlarının eyni etnik, tarixi və mədəni köklərə mənsubluğunun münasibətlərin inkişafı üçün gözəl zəmin yaratdığını bildirib. Azərbaycan və Türkmənistan prezidentlərinin iki ölkə arasında əlaqələrin genişləndirilməsi məsələsini diqqətdə saxladıqları vurğulanıb. Regional layihələrin icrasında, xüsusən tarixi İpək Yolunun bərpasında tərəflərin əməkdaşlıq etdiyi bildirilib. Son zamanlar qarşılıqlı səfərlərin və təmasların artdığı və bunun əməkdaşlığın getdikcə dərinləşməsinin bariz nümunəsi olduğu qeyd edilib. Əlavə edilib ki, böyük türkmən şairi Məhtimqulu Fəraqinin “Divan”ı azərbaycanlı və türkmənistanlı mütəxəssislərin iştirakı ilə yenidən nəfis şəkildə nəşr olunub.
Türkmənistan Nazirlər Kabineti sədrinin müavini Sapardurdı Toyliyev Prezident Qurbanqulu Berdiməhəmmədovun Respublika Günü münasibətilə Azərbaycan xalqına ünvanladığı təbriklərini çatdırıb. O, Türkmənistanda Azərbaycanla dostluq münasibətlərinə yüksək dəyər verildiyini söyləyib, hər iki ölkənin qədim zamanlardan etibarən mehriban qonşu olduğunu, xalqlarının isə ortaq dil, tarixi və mədəni dəyərləri bölüşdüyünü qeyd edib.
Bildirilib ki, Türkmənistanın Prezidenti Qurbanqulu Berdiməhəmmədovun 2008-ci ilin may ayında Azərbaycana səfəri və Azərbaycan Prezidenti İlham Əliyevin həmin ilin noyabr ayında Türkmənistana səfəri ikitərəfli münasibətlərin inkişafında yeni mərhələ açıb. O, həmçinin Türkmənistanın dövlət başçısının 2015-ci ilin iyun ayında ölkəmizdə keçirilmiş ilk Avropa Oyunlarının açılış mərasiminə qatıldığını və bu səfər çərçivəsində Azərbaycan Prezidenti ilə keçirilmiş görüş zamanı əldə olunmuş razılaşmaların münasibətlərin inkişafına yeni təkan verdiyini nəzərə çatdırıb.
Türkmənistan rəsmisi iki ölkə arasında beynəlxalq təşkilatlar çərçivəsində də uğurla əməkdaşlıq edildiyini bildirərək Azərbaycan Respublikasının Türkmənistanın neytrallıq statusunu dəstəkləyən ilk ölkələrdən biri olduğunu qeyd edib. O, ölkələrimiz arasında elm və mədəniyyət sahələrində də əməkdaşlıq üçün perspektivlərin mövcud olduğunu diqqətə çatdırıb. Azərbaycanın Türkmənistanda, Türkmənistanın Azərbaycanda mədəniyyət günlərinin keçirildiyi bildirilib. Qeyd olunub ki, görkəmli türkmən klassikləri Məhtimqulu Fəraqi, Mollanepes, Nurmuhammet Andalib, Türkmənistan Prezidenti Qurbanqulu Berdiməhəmmədovun kitabları Azərbaycan dilinə, eləcə də “Görkəmli insanların həyatı. Heydər Əliyev” kitabı türkmən dilinə tərcümə olunub. S.Toyliyev Azərbaycan ilə Türkmənistan arasında münasibətlərin hər iki xalqın rifahı naminə daha da inkişaf edəcəyinə əmin olduğunu bildirib.
Rəsmi qəbulda Azərbaycandan gəlmiş incəsənət xadimləri milli musiqi nümunələri ilə çıxış ediblər.
İlahə Əhmədova
AZƏRTAC-ın xüsusi müxbiri
Aşqabad
Bölmənin digər xəbərləri
