Bakıda “Üfüqləri aşaraq: Dayanıqlı Kosmos, Dayanıqlı Yer” mövzusunda konfrans keçirilib VİDEO
Bakı, 11 iyun, AZƏRTAC
“Azərkosmos” və Kosmik Nəsil Məşvərət Şurasının (KNMŞ), Azərbaycan Gənclər Fondunun (AzGF) və Gənclərin Maarifləndirməsinə Dəstək İctimai Birliyinin təşkilatçılığı ilə Azərbaycanda artıq ikinci dəfə “Space Generation Azerbaijan (SG Azerbaijan)” tədbiri keçirilib.
AZƏRTAC xəbər verir ki, tədbir “Üfüqləri aşaraq: Dayanıqlı Kosmos, Dayanıqlı Yer” mövzusuna həsr olunub.
Tədbirin mövzusunun çox aktual olduğunu bildirən Azərbaycan Kosmik Agentliyinin (Azərkosmos) İdarə Heyətinin sədri Saməddin Əsədov bildirib ki, bu, “Azərkosmos”un KNMŞ ilə birgə Azərbaycanda keçirilən sayca ikinci tədbiridir.
“Dünya İqtisadi Forumunun məlumatına görə, hazırda müxtəlif qlobal istiləşmə göstəricilərini ölçən 160-dan çox peyk var və əsas iqlim dəyişikliklərinin yarısından çoxu yalnız kosmosdan ölçülə bilər. “SG Azerbaijan 2024” həm yerli, həm də qlobal miqyasda kosmik təşəbbüslərin gündəlik həyatda necə töhfə verə biləcəyi haqqında məlumatlılığı inkişaf etdirir, eyni zamanda, ekoloji cəhətdən məsuliyyətli kosmik fəaliyyətlərə səsləyir. İqlim dəyişikliyi ilə bağlı məlumatların 60 faizdən çoxu məhz kosmosdan alınır. Azərbaycan da iqlim dəyişikliklərinin izlənilməsini kosmos və kosmik texnologiyalarla müşahidə edir. Kosmos iqlim dəyişiklikləri ilə mübarizədə əsas alətlərdəndir”, - deyə S.Əsədov əlavə edib.
Yer kürəsinin iqliminin daim dəyişdiyini qeyd edən “Azərkosmos” sədri bildirib ki, iqlim dəyişikliyinin kosmosdan ölçülməsi üçün ilk dəfə xüsusi elektron platforma hazırlanıb: “Yeni platforma iki dildə olmaqla 5 bölmədən ibarətdir. Platformada göstərilən məlumatlar iqlim dəyişikliyi barədə məlumatlılıq səviyyəsinin artmasına töhfə verəcək. Burada 21 milyon kvadratmetr ərazinin son 30 ildə plan hesabatı kosmik texnologiyalar vasitəsilə əldə edilib. Qeyd etmək istəyirəm ki, elektron platforma üçün əsas informasiya mənbəyi “Azersky-2” peyki olub”.
Sədr onu da diqqətə çatdırıb ki, noyabrda Bakıda keçiriləcək BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu sessiyasında (COP29) bu elektron platforma tədbirin uğuruna xidmət edəcək.
Azərbaycanda iqlim dəyişmələri fonunda yaranan əsas problem su ilə bağlı olduğunu vurğulayan S.Əsədov deyib ki, Dünya Resurs İnstitutunun araşdırmasına görə 2040-cı ildə ciddi quraqlıqla üzləşmək ehtimalı olan ölkələr arasında Azərbaycan 18-ci yerdə qərarlaşıb.
“Sadaladığım səbəblərə görə deyə bilərəm ki, dünyada COP kimi qlobal tədbirin keçirilməsi, o cümlədən bu gün burada təşkil etdiyimiz “Kosmik Nəsil Azərbaycan” tədbiri birtərəfli məsələ deyil. İqlim dəyişikliyi və dayanıqlılıq artıq bütün dövlətlər qarşısında danılmaz reallıqdır. Temperaturun qlobal səviyyədə artması, təbii fəlakətlər, quraqlıq kimi hadisələr çoxalıb. Sürətlə dəyişən iqlim insanlar üçün sağlamlıq problemləri yaradıb. Biz, əslində, kosmosdan iqlimimiz haqqında çox şey öyrənə bilirik”, - deyə S.Əsədov əlavə edib.
Tədbirdə çıxış edən Azərbaycan Gənclər Fondunun icraçı direktor vəzifəsini icra edən Qədir Xəlilov diqqətə çatdırıb ki, növbəti aylarda Azərbaycan Gənclər Fondu rəqəmsallaşmaya dair qrantlar elan edəcək.
“Hazırda dünyada süni intellekt və rəqəmsallaşma prosesi çox sürətlə inkişaf edir. Biz bundan kənarda qala bilməzdik. Azərbaycan Gənclər Fondu olaraq rəqəmsallaşma alətlərini inkişaf etdiririk. Gələn aylarda rəqəmsallaşmaya dair qrantlarımız olacaq. Bu həm fərdi, həm də komanda və ya təşkilatlar üçün nəzərdə tutulub”, - deyə Qədir Xəlilov bildirib.
Azərbaycanda gənclər siyasətinin uğurlu inkişafından bəhs edən Q.Xəlilov deyib: “Azərbaycanda ölkə başçısının dəstəyi və diqqəti nəticəsində gənclər üçün çox gözəl şərait yaradılır, onların inkişaf etməsi üçün bütün imkanlar mövcuddur. Hazırda gənclərimiz beynəlxalq səviyyədə ölkəmizi təmsil edir, yüksək nəticələr əldə edirlər. Bunun davamı olaraq, biz də gənclər üçün müxtəlif tədbirlər keçirməyi planlaşdırırıq. Belə ki, növbəti aylarda Azərbaycan Gənclər Fondunun və “Azərkosmos”un təşkilatçılığı ilə regiona səfərlər, gənclər üçün düşərgələr və digər tədbirlər təşkil olunacaq”.
Sonra BMT-nin Kosmik Mәsәlәlәr üzrә İdarәsinin direktoru (videobağlantı formatında) Aarti Holla-Maini və SGAC direktoru Nikol Koleva tədbirin əsas məqsədinin davamlılıq və kosmos mövzularını birləşdirərək, bu iki vacib sahənin qarşılıqlı əlaqəsinin dərin başa düşülməsi olduğunu qeyd ediblər.
“Space Generation Azerbaijan” tədbirində əsasən 18-35 yaş qrupuna aid olan tələbələr, dayanıqlığa maraq göstərən gənc mütəxəssislər və alimlər, kosmos həvəskarları, kosmik elm və texnologiya sahəsinə dair sessiyalarda, panel müzakirələrdə, vebinarlarda, master-klaslarda və netvörkinq fəaliyyətlərində iştirak ediblər.
Bölmənin digər xəbərləri
