Tovuzun dağlıq Çeşməli kəndində bal süzümündən REPORTAJ–FOTO VİDEO
Tovuz, 27 iyul, Ruslan Novruzoğlu, AZƏRTAC
Bu il yaz aylarından yayın əvvəlinə qədər havanın yağıntılı, qeyri-sabit keçməsi arıçılığa müəyyən qədər təsir göstərsə də, arıçılar pətəklərdən istədikləri məhsulu əldə edə bilirlər. Ötən il, demək olar ki, arılar yaxşı bal toplaya bilməmişdi. Bəzi arıçılar ümumiyyətlə süzüm etməmişdilər. İndi isə bal süzümündən arıçılar yüksək məhsuldarlıq əldə edirlər.
AZƏRTAC xəbər verir ki, Tovuz rayonunun aran hissəsində bal süzümünə bir qədər əvvəl başlanılsa da, dağlıq kəndlərdə arıçılar yeni süzüm edirlər. Hər tərəfi dağ-dərə, çəmənlik olan Çeşməli kəndində arıçılığa xüsusi maraq var. Müxtəlif çiçəklərdən ibarət geniş çəmənlik sahələr burada arıçılığı inkişaf etdirməyə şərait yaradır. İlkin müşahidələr onu deməyə əsas verir ki, yaz aylarında yağıntı olsa da, bol məhsul gözlənilir. Arıçılar arı ailələrindən təxminən 15-20 kiloqrama qədər bal götürə bilirlər.
Bu yaz yağışların çox olması təsərrüfatın bu növünə müəyyən qədər təsir göstərdi. Lakin süzüm vaxtına qədər arı ailələri təbiətdən yaxşı nektar toplaya bildi. İndi isə yetişmiş, möhürlü çərçivələr pətəklərdən götürülür, daha sonra bal süzümü aparılır.
Uşaq yaşlarından arıçılıqla məşğul olan 83 yaşlı Qəzənfər Qasımov deyir ki, hazırda onun 60 arı ailəsi var. Bu mövsüm hər bir ailədən azı 10 kiloqram bal götürəcəyinə inanır. Lakin daha çox bal toplayan pətəkləri də var. Arıçı deyir ki, bu il bal da çox olacaq. “Çeşməli kəndi ərazisində çoxlu bal bitkiləri var. Əkinlərin ətrafında, dağlarda, çəmənliklərdə arılarımız yaxşı nektar toplayıb. Keçən il məhsuldarlıq az oldu, az balın da qiyməti köhnə qayda ilə idi, bu il məhsul boldur, qiymət artımı yoxdur. Hazırda süzülmüş balın kiloqramı 30, 40, 50 manat civarında satılır”, - deyə Qəzənfər Qasımov bildirib.
Arıçılar ucqar ərazidə yaşadıqlarından məhsullarını böyük şəhərlərə satmağa aparmaqda çətinlik çəkirlər. Təklif edirlər ki, yaxın ərazilərdə bal qəbulu məntəqələri olsa, bu sahədən daha çox gəlir əldə edə bilərlər və arıçılığı daha da inkişaf etdirərlər. Bunun üçün kifayət qədər təbii şəraitləri də var. Bal yarmarkalarında iştirak edə bilməyən dağ sakinləri yarmarkaların nisbətən yaxın ərazilərdə təşkil etməyin zəruriliyini bildirirlər. “Bizim zonada balın 60-70 faizi süzülüb. Hava yaxşı olsa, 10-15 gün mövsüm davam edə bilər. Havanın rütubətli keçməsi ilə əlaqədar məhsuldarlıq keçənilkindən çox yaxşıdır. Demək olar ki, çərçivələrin hamısı dolub”, - deyə arıçı Rizvan Quliyev əlavə edib.
Bal süzümü mexaniki üsulla işləyən avadanlıq vasitəsilə aparılır. Pətək bal 50 manatdan, süzmə isə nisbətən ucuz - təxminən 30, 40, 50 manat civarında dəyişir. Arıçıların sözlərinə görə, onlar bəzən məhsullarını elə ətraf kəndin sakinlərinə satırlar. Bunun üçün rayon mərkəzi və digər şəhərlərə bal aparmağa ehtiyac qalmır. Bu il isə bal bol olduğundan arıçılar artıq indidən müştəri axtarırlar. Qeyd edək ki, balın kiloqramının qiyməti hələ 30-50 manat civarındadır. Bal süzümündən dərhal sonra isə arıçıları xeyli iş gözləyir. Belə ki, pətəklərin qış ehtiyatı gecikdirilmədən təmin edilməlidir. Qış ehtiyatı azdırsa, arı ailələri yemlənməli və dərmanlarla profilaktik tədbirlər görülməlidir.
Bölmənin digər xəbərləri
