QAN YADDAŞI
31 mart – Azərbaycanlıların Soyqırımı Günü Serbiyada ehtiramla anılmışdır
Bakı, 29 mart (AZƏRTAC). Martın 29-da Azərbaycanın Serbiyadakı səfirliyində 31 mart - Azərbaycanlıların Soyqırımı Günü ilə bağlı faciə qurbanlarının xatirəsini anma mərasimi keçirilmişdir.
Səfirlikdən AZƏRTAC-a bildirmişlər ki, mərasimdə diplomatik nümayəndəliyimizin əməkdaşları, Belqraddakı Azərbaycan Mədəniyyət Mərkəzinin və Serbiya-Azərbaycan Ticarət-İqtisadi Palatasının təmsilçiləri, Azərbaycan icmasının üzvləri və bu ölkədə təhsil alan tələbələrimiz, Serbiya ictimaiyyətinin, KİV-lərin və Belqrad şəhərinin müsəlman icmasının nümayəndələri iştirak etmişlər.
Mərasimdə ermənilər tərəfindən zaman-zaman Azərbaycan xalqına qarşı həyata keçirilmiş qanlı qırğınlar, xüsusilə 1905-1907-ci illərdə Bakı, Şuşa, Zəngəzur, İrəvan, Naxçıvan, Ordubad, Eçmiədzin, Cavanşir və Qazax bölgələrində törədilmiş vəhşiliklər barədə ətraflı məlumat vermişdir. Bu qırğınların 1918-ci ilin mart-aprel aylarında Azərbaycanın Bakı, Şamaxı, Quba, Muğan və Qarabağ bölgələrində daha geniş xarakter alması, həmin soyqırımı aktları zamanı soydaşlarımızın xüsusi amansızlıqla qətlə yetirilməsi, on minlərlə günahsız insanın doğma yurd-yuvasından didərgin salınması diqqətə çatdırılmışdır.
Tədbirdə erməni millətçiləri tərəfindən zaman-zaman xalqımıza münasibətdə yürüdülən etnik təmizləmə və soyqırımı siyasətinin bu gün də davam etdiyi vurğulanaraq ötən əsrin 80-ci illərinin sonlarında Ermənistanın Azərbaycana qarşı ərazi iddiası ilə müşayiət olunan işğalçılıq siyasətinin acı nəticələrindən danışılmışdır. Bildirilmişdir ki, bu zaman erməni yaraqlıları tərəfindən həyata keçirilmiş və xüsusi amansızlığı ilə seçilən vəhşiliklər, Ermənistanın ölkəmizə qarşı yürütdüyü işğalçılıq siyasəti, Xocalı soyqırımı, Azərbaycanın digər rayonlarının işğalı mahiyyət etibarilə terrorçuluğun Ermənistanın dövlət siyasətinin tərkib hissəsi olduğunu bir daha sübut edir.
Tədbir iştirakçıları martın 31-nin azərbaycanlıların soyqırımı günü kimi qeyd olunması haqqında ümummilli lider Heydər Əliyevin 1998-ci il 26 mart tarixli Fərmanının böyük tarixi əhəmiyyətini vurğulamış, bu sənədin xalqımızın milli şüurunun oyanmasında mühüm rol oynadığını qeyd etmişlər.
Azərbaycanlıların soyqırımı günü ilə bağlı səfirlik tərəfindən hazırlanmış mətbuat məlumatı Serbiyanın dövlət və hökumət orqanlarına, parlament üzvlərinə, qeyri-hökumət təşkilatlarına, Belqradda fəaliyyət göstərən xarici ölkələrin səfirliklərinə və beynəlxalq təşkilatların nümayəndəliklərinə göndərilmişdir.