Zaqatalanın çay plantasiyalarında bol məhsul yetişib VİDEO
Zaqatala, 24 iyun, AZƏRTAC
Zaqatala rayonunda çayçılıq uzun illərdir əsas gəlirli sahələrdən biridir.
AZƏRTAC-ın bölgə müxbirinin məlumatına görə, bu il rayonun Qazangül qəsəbəsində fəaliyyət göstərən çayçılıq təsərrüfatlarında bol məhsul yetişib. Havaların yağmurlu keçməsi yaşıl çay yarpaqlarının daha yaxşı və keyfiyyətli yetişməsinə şərait yaradıb. Hazırda çayçılar növbəti dərimi həyata keçirirlər. Yaşıl çay yarpaqlarını səhərin erkən saatlarında toplamaq vacibdir. Ona görə də çayçılar bu kimi şərtlərə ciddi əməl edirlər.
Təsərrüfat rəhbəri Pərviz Şabanovla çay sahəsində görüşürük. Onun sözlərinə görə, bu il sahələrdən 20-25 ton yaşıl çay tədarük etməyi planlaşdırır. O, çay sahələrinin ömrünü artırmaq məqsədi ilə plantasiyanın 50 faizinə damcı suvarma sistemi quraşdırıb. Qarşıdakı illərdə qalan sahələrdə də bu sistemin tətbiqi nəzərdə tutulur. Təsərrüfat rəhbəri bildirir ki, bu üsul həm də çayın məhsuldarlığını və keyfiyyətini artırır.
Çayçılıq təsərrüfatı ilə fermerlər arasında ilin əvvəlində məhsulun alqı-satqısına dair müqavilə bağlanılır. Yəni fermerin məhsul satışı ilə bağlı heç bir qayğısı yoxdur. Əsas odur ki, məhsul keyfiyyətli və normativ qaydalara uyğun olsun.
Plantasiyada çayçıların sürətlə işləməsini müşahidə edirik, ilk baxışdan elə düşünürsən ki, məhsul yığımı asandı. Lakin elə deyilmiş. Çayçılar həm yetişən yaşıl çay zoğlarını dərir, həm də lazımsız hissələri dərib gübrə əvəzi kolların dibinə atırlar. Bunu elə sürətlə edirlər ki, diqqətlə izləməsən bilmək olmur.
Sahədə çalışan Tünzalə Muhumayevaya yaxınlaşıb, məhsul yığımının neçə keçməsi ilə maraqlanırıq. Artıq beş ildir bu sahədə işləyən və kollektivin ən fəallarından olan Tünzalə xanım bildirir ki, çay yığımına mayın əvvəlindən başlayıblar.
“İndi çay yığımının üçüncü mərhələsidir. Keçən illərə nisbətən bu il məhsulumuz boldur. Bu, hava şəraitindən asılıdır. Havaların yağmurlu keçməsi çayçılıq üçün əlverişli sayılır”, - deyən Tünzalə xanımdan gün ərzində neçə kiloqram məhsul yığdıqları ilə maraqlanırıq: “May ayında səhər saat 6-dan 10-a kimi 50-60 kiloqram yığırıq. İndi isə bu çayı dənə-dənə, yarpaqsız yığmaq lazımdı, ona görə gün ərzində 30-40 kiloqram yığa bilirik”.
Əlbəttə, hər bir çay yığan işçi, ilk növbədə, aqrotexniki qaydalara ciddi əməl etməli, yığdıqları yaşıl çayın keyfiyyətinə əmin olmalıdır.
Fərdi təsərrüfatında çay yetişdirib emal müəssisəsi ilə müqavilə bağlayanlar da az deyil. Onlardan biri Zamir Bəşidovdur. Fermerin 0,34 hektar çay sahəsi var. Zamir çəkdiyi zəhmətin bəhrəsini yetərincə gördüyünü deyir. “Birinci yığımda bir tona yaxın məhsul satmışıq. İndiki yığımdan isə təxminən 600-700 kiloqram məhsul gözləyirəm. Builki məhsul yaxşıdır, havalar yağıntılı keçdiyi üçün məhsulumuz boldur”, - deyən Zamir payız və yaz aylarında sahəsinə yaxşı aqrotexniki qulluq göstərdiyini sözlərinə əlavə edir.
Qeyd edək ki, çay kolları əkiləndən 8-10 il sonra ilk barını verir. Tam barvermə müddəti isə 20-25 ilə başa gəlir.
Bölmənin digər xəbərləri
